(door Henk de Koning)
Stikt de buule!
Klop op de deure van de borgemeesterskamer.
Borgemeester (geargerd): ‘Wat now weer?!!’
Bromsnurre (kump opgewekt binn): ‘Ook goeje morn uwes edelachtbare borgemeester. Druk met ‘Hamertien Tik, a’k zo kiekke?’
Borgemeester (grote deukn in zien ambstketen teunend): ‘Ja, de ambtsketen een bietien uutdeukn. D’r wurdt zo vake teegn ‘et gemeentebestuur an’eskupt en zo’n ketting is dan ‘et mikpunte. Now weer die netuurvrinden van de Warkgroep Zwartndiek. Stapm weer noa de rechter en weurumme?’
Bromsnurre: ‘Umme reden det de gemeente een vergunning ‘ef of’egeumm veur de anleg van een noodweg, dwars deur ‘et gebied van de bypass. De ofwaterink van de IEssel noa de Randmeern. Maar de Raad van State ‘ef wark deuran verbeuden. Eerst mut onderzuch wurn of de anleg van de bypass gien ska dut an ‘et netuurgebied bi’j de Zwartndiek. Maar now de gemeente niet luustert, mu’k ze wel bekeurn. ‘Oe name!’
Borgemeester (verskrikt): ‘Name?! Maar die kenn ie toch! Kiek uut oe dopm, man! Ik bint, oe eignste borgemeester: Bort Koelewien!’
Bromsnurre (zien bonbuukien pakkend): ‘Wie mut ‘ier now uut zien dopm kiekn? Maar vertelt ies... Bort met een D, van burd veur de kop, umme reden det de gemeente toch dut wat ze verbeuden is, of de T van onskuldig toestoan..? ’
Borgemeester (getargd): ‘Ja zeg, now wurdt ie mooi! Wie is ‘ier now ‘eufd van de pliesie? Ik as borgemeester toch zekers! En deurbi’j, de vergunnink veur de anleg van die noodweg deur verbeuden gebied, die konden wi’j as gemeente de uutvoerders niet weigeren. ‘Mut kunn,’ zo ‘em onze hadvocoatn ons teveurn deskundig in’elicht!’
Bromsnurre: (noterend) ‘Met een D dus!’
Borgemeester ( zo ‘ellug as maar kan) Nee! Bort met een T!!!’
Brom: ‘Bedaart maar. Veur mien part met DT! Trouwens, de gemeente zwalkt de leste tied wel vakerder met vergunninks. Kiek noa de luigies van de Stichting Herstel Kadekrane in Kampm. Sappelen 180 000 euro an sponsorgeld bi’j menare veur de bouw van een skitterend warkende olderwetse krane. Zo ene die vrogger op de Iesselkade ‘ef ‘estoan veur ‘et laden en lussen van skeepm. Maar wat dut de gemeente? Grep 2500 euro van det sponsorgeld an precario, enkelt en allenig veur ‘et ofgeemm van een vergunnink det die krane op die olde plekke mag stoan.’
Borgemeester: ‘Ja, ho ies eemm! Een vergunnink uutskriemm is ook wark. Veur niks giet de zunne op?!’
Brom (misnoegd): ‘2500 euro belastink op een kedo det een anwinst is veur ‘et historisch anzien van de stad! Gelukkig det een slimme hamptenaar de Stichting ‘ef ‘etipt subsidie op die belastink an te kunn vroagn bi’j de gemeente.
Borgemeester (verrast): ‘Subsidie op een vergunnink?! Maar wat blef er dan veur de gemeente nog over?!’
Brom: ‘Een ni’je Kamper ui, borgemeester!’
Borgemeester ( kwoad): ‘Ja, voorts nog wat?!’
Brom: ‘Zekers, edelachtbare. Now wi’j toch over vegunninks an de proat bin, graag vijf stuks veur vijf bisskoppelukke ‘ulpverleners, die as asielzuukers in Kampm wiln bliemm.’
Borgemeester (verskrikt): ‘Toch gien Zwarte Pietn, Brom?!’
Bromsurre: ‘Toch wel, borgemeester. Vijf Zwarte Pietn, die ‘et zat bin deur Sundekloas ‘eknecht te wurn, now die olde zich steeds vakerder inlut met gekleurde Pietn.’
Borgemeester: ‘Ja, Sundekloas stiet vakerder onder druk van haksiegroepm, die ook ‘et medarne wark van Zwarte Piet bekiekn as uutwas van de slavernij. Maar zeg ‘et ies Brom, weur bin die Pietn now?’
Bromsnurre: ‘Bi’j mien thuus borgemeester. In de skuure achter ‘t ‘uus. Zeg maar: ‘et Achter’uus.’
Op de IEssel in een wankel beutien op’epikt deur Gait van der Veer en zien vrouw Ingela. De skipper-eigenaars van die skitterende salonboot ‘De Veerman van Kampm. Die ‘em die vijf op’evist en liniaal rectum noa mien ‘uus ‘ebracht. Clandestien want ‘et Central Orgaan van Asielzuukers oordeeln Kampm niet ‘eskikt veur de opvang van asielzuukers.’
‘Borgemeester (geargerd) ‘Ja, de COA ‘ef mien det persoonluk bericht.’
Bromsnurre: Wat zeg onze premier deur van?’
Borgemeester: ‘Rutte was in eign land eemm niet transparant Brom, maar an ‘t wark in Amerika.’
Brom: ‘Ja, de premier zal wel ‘edacht ‘em: ‘Beter an de Cola Light in Amerika as an de zweure Oranje-bitter in Drenthe. Nee, dan pette of veur staatsscretaris Klaas Diekoff. Ene bonke improvisasie-talent...! Want weur loat ie zo rap een kladde asielzuukers op ene stuit?! An alle kanten bedden tekurt. ‘Dan maar noa Drenthe!’ besleut Diekoff. Hunnebedden zat deur! Goed begriepm, de durpsbewoners van Oranje maakten zelf de fout ‘nee’ te zègn teegn een dubbele portie asielzuukers. Diekhoff mos metene denken an die TV-reclame van vrogger: ‘Zeg nee, dan krie’j er twee!’
Borgemeester: ’t Wurdt anders op 5 december nog knap lastig onze kienders uut te lègn det die donkere gasten uut ‘et buutnland now ies niet onze skoe koomm vuln, maar wi’j uut onze zak die boot-skuugies van ‘ullie.’
Brom: ‘Toch mooi det Zwarte Piet in Kampm wel kleur-echte blef. In Kampm stapm ze niet zo makkeluk van d’r geleuf of!’
Borgemeester: ‘Wat die vijf knechten van oe angiet Brom, die magn bliemm. Want Kampm is een mooie stad, maar teems een gastvri’je stad. Ook al is det bi’j de COA nog niet deur’edrungen.’ Astamblieft Brom, breng die vergunninks maar rap noa die vijf Pietn en zeg er bi’j: ‘Welkom in Kampm!’
Brom (de deure uutlopend): ‘Bedankt! Teems een goed begin van oe tweede termijn as borgemeester in Kampm. Een borgemeester die wet wat ‘et wil zègn van ‘arte te magn bliemm!
‘Allo, Hendrik
PS: Wim Schrijer, de meest Kampense ambtenaar van de borgelukke stand is overleden. Sinds ie begun in 1985 ‘ef ie de trossen van bi’jmenare 1500 ‘uweluksbeuties lus’egoojd. ‘O gunst, ku’j det now al zien?!’ skruk een bruidtien, toen ze met ‘aar anstoande vuus te late op ‘et stad’uus verskeen en Wim, niet wetend det ze kold in verwachting was, ‘aar knurrig toesprak: Welkom, maar ie bint wel zweur over tied...!’
