(door Henk de Koning)
Stikt de buule!
Bi’j alle medallie-koorse van de leste tied mocht de uutreikingk van een mooie Kamper medallie niet ontbreekn. De Rotary van de Stadsbrugge besleut deurumme borgemeester Bort Koelewijn te onderskeiden met de golden medallie van verdienste in de Orde van ‘et Erekruus van de Ni’je Toorn. Compleet met de versierselen en de leuze: ‘Kampm is een stad, Wilsum is nog wat, maar Zwolle is een gat.’ De borgemeester kreg de oorkonde veur zien bizundere gevuul veur weure skoon’eid. ‘Vertel mien wat,’ sprak Dark Toestebolte, ‘weurumme anders denk ie det Bort borgemeester van Kampm is ‘ewurn?
Reden ook det ie ‘evroagd wier in ‘et ‘Uus der Kunsten’ in de Veurstroate een tenteunstellingk in te richten van enkelt zien smaak: ’De Smaak van de Borgemeester.’ ‘Eerst denk ie, zekers enkelt de petretn in glose hup van de wet’olders,’ bekenn Jan Rap in ’t Zadel, ‘maar nee, de heksposisie bestiet uut een verskeiden’eid an skilderij’jn en keramische veurwarpm van kunstenaars, die wat met Kampm ‘em of ‘adden. Deur bi’j dan as borgemeester best wel eemm zuute mee. De wet’olders intussen konden tussentieds speuls d’r gang goan. Wet’older Meijering bi’j veurbeeld ‘ad ‘er skik van met de gemeentekas op skoot de 1,9 miljoen euro bi’j menare te skraapm, die now extra neudig bin veur ‘et weer vlot trekn van de gestrande bouw van de perkeergaragie an de Buutnhaamm.
‘E t skilderij ‘Boganaka’ stiet veur: ‘Bort gaat naar Kampen’, maar jaagn alle bezuukers skrik an. De gemeente Rijssen beud ‘et Bort an bi’j zien vertrek as borgemeester noa Kampm. De ofbeeldingk teunt de knalrooje kop van een wild zwien, anvallerug uut’ebeeld met met zweure slagtanden en de bek vijandig lus. Drie van zukke zwijnenkuppies koomm veur op ‘et gemeentewaapm van Rijssen! Vandeur! ‘Mien kleinkienders bin er ooki bange veur,’ bekenn Bort bi’j de exposisie. ‘Hangt det skilderij dan in roadszaal,’ steln Jannus Flapuut veur. ‘Kunn de fraksies permenent anskouwn wat ze ’ezwijnd ‘em met Bort as borgemeester.’ En ook det nog wat op ons ofkump: de gemeenteroads-verkiezingks! Ma’j met ‘et rood inkleurn van een wit rundtien, fröbelend weer oe bi’j drage leveren an de dimmokrasie. Polletieke verkiezinks ‘em dét met religie gemeen, ie munn er in gleumm wi’j d’r wat an ‘em. Toch zie’j veur beide de loop er uutgoan. ‘Nog een geluk det op de toorns van de meeste karkn een hane stiet, anders kwam er ‘elemoale gien kippe,’ riddeneern Jannus Flapuut. Bartus Galmgat ‘old de moed er toch in. ‘Een ni’je gemeenteroad, een ni’j geluud!’ is zien opvarringk. Dark Toestebolte betwiefelen det. ‘Wat a’j een ni’je gemeenteroad nuumm!
Olde wien in ni’je zakn, zu’j bedoeln. Roadsleden die de veurdeure van ’t stad’uus uutgoan en er an de achterdeure weer inkoomm. ‘Et vroggere roadslid Rie Woning bi’j veurbeeld. Met 83 bi’j de koomde verkiezinks bi’j ‘Sociaal Kampm’ an de achterdeure polletiek weer in opmars. Wel achter de rollator, maar as ni’je partij kan ‘Sociaal Kampm’ elk opdrukkertien goed gebruukn. Rie was vrogger de ‘pluushopper’ in de Kamper gemeenteroad. Hoppend van ‘et ene pluus op ‘et andere. Van ‘et PvdA-pluus, noa ‘et pluus van ‘Gemeentebelang’ en vandeur noa ‘Verontruste Borgers.’ Now weer pluuzebollend met ni’j komer ‘Sociaal Kampm.’
Nee, gien vaste-verkeringk-type, die Rie. Old wet’older Martin Ekker stapm polletiek an’eskeutn de veurdeure van ’t stad’uus uutt, umme er op ‘et tableau van de VVD an de achterdeure weer in te koomm. Wel op een onverkiesbare plaase, maar toch weer een beginnegien. Aken en Keuln bin ook niet op ene dag ‘ebouwd, of umme met Kampm te spreekn: ‘Ook Van Heutsz is ooit ies lege begunn.’ Deur old wet’oldster en in de roadszaal veurmalig dansmarieke Janita Tabak boomm an de kieslieste te zetn, ‘oopt de PvdA weer wat rooskleuriger uut de Kamper stembusse te koomm. ‘Et PvdA-roadslid Suat Azer, die Janita veur de veranderingk met de kwik-step zag ankoomm, dacht metene: ‘An mien lief gien pollenaise,’ en vluchten liniaal rectum noa Gemeente Belang. Wel mos Nardes Koster deur dan een ende op de lieste opskikn, ook al umme reden det Suat met zien olde PvdA-zetel en al bi’j Gemeente Belang ‘polletiek asiel’ ‘ad an’evroagd. ‘Geen punt,’ vatn Nardus zien mindere plekke sportief op, ‘as er met mien persoon maar mesiek in de partij blef’. Suat deed net of zien neus bloeden. Niet enkelt umme de bekende kleure, maar ook te druk met ‘et lusweekn van de sticker: ‘Gelieke Kansen’, die nog altoos niet van zien olde PvdA-zetel wol lusloatn...
Dan ei’j duukbootcommandant Richard Boddeus, die in de road zien eign Socialistische Partij torpedeern en uut ‘et wrak’olt ‘et reddinksvlot ‘Sociaal Kampm’ in menare timmeren. Klaas Knijnenberg, as roadslid al lange uut’esparteld bi’j Gemeente Belang, deuk er metene op of. A’j ‘em deur op drift soms uutneudigend zaagn wenken, was det noa Rie Woningk, die toen nog in een polletiek vacuum ronddobberen.
André Klumpje speuln veur Brutus bi’j de Christen Unie, deur de eign partij met een kritische brief in de krante een messe in de rugge te steekn. Gelukkig veur André det ‘et partijprogram vande Christen Unie veurnameluk:‘ Liefde veur de Medemens’ predikt, zodet André wel op de lieste kan bliemm, maar dan wel liefdevol op een onverkiesbare plaase. Veurnameluk een flink ende uut de buurte van de sliepstene… Voorts roadsleden die met de koomde verkiezingks uut eign vrij’je wille fier de veurdeure van ’t stad’uus uutkuieren.
Wet’older Veldhoen en Cor Adema van ‘et CDA bi’jveurbeeld. Cor teunen zich as kiend al met bellegien trekken ‘eskikt veur de polletiek. Die kwoajongensstreke kwam ‘em later goed van passe toen ‘et CDA ‘em op een onverkiesbare plaase polletiek ‘et kruus noa wol geemm. Maar Cor, ‘uus an ‘uus bellegien trekkend, wist de kiezer te fokseern ‘em met veurkeurstemm asnog op ‘et pluus te tiln. De vroage is: bin wi’j zo metene met de verkeizingks die olde rotn in ‘et polletieke vak dan ook allemoale warkeluk kwiet? De tied zal ’t leern. Want ie weetn, de achterdeure van ’t stad’uus stiet altoos lus….
Allo, Hendrik
