Nog eem en de road bug zich weer over de begroting, een begroting die deur ’t college as slutend an de road an e beudn wordt, Maar in principe is ’t freubel wark want eij wordt kunstmatig slutend e maakt deur geld uut de rezarve pot te aaln. Neem doar as gezin maar gien veurbeeld an, want ’t is oe zelf veur de gek oaln. En aj dan ook nog in ogenskouw neem wat de gemeente nog mogelijk te wachtn stiet noa de uutspraak van de Raad van State, dan kuj de borst nog nat maakn.
Overigens um doar nog eem op terug te koom, ik weet niet oe ’t jullie vergiet maar as ik over de Kamper Stroatweg richting Wezep riede en ie zien die gigantische butn zand dan dan skrikke ie oe wild en springn mien in ieder geval de troann in de oogn, en dan vroag ik mien of, gemeente woar bij toch in vredes name mee bezig. Wat muj toch met zo’n klimaatdiek as det Reevedorp niet deurgiet. Is ’t now zo muuili’jk um te erkenn det d’r ooit een verkeerde beslissing e neum is en det een antal deskundigen, niet de eeersten de besten, die jullie van ’t begin of an onderbouwd met argumentn e waarskouwd em begin d’r niet an, ’t geliek an un kante em. Beter ten álve gekeerd dan ten ‘ele gedwaald kump in ’t college woordn boek kenneli’jk niet veur. Jammer want uuteindeli’jk kump de rekening op ’t bortien van ons allemoale.
Woar ik as geboorn en getoogn Brunneper wel merakels bli’j mee bin is det de brunneper bongerd niet vol e plempt wordt met ‘uuzn, ‘ier is ’t wel beter ten ‘alve gekeerd dan ten ‘ele gedwaald. En dan nog is ’t pas gerealiseerd umdet de ontwikkelaar d’r van of ziet in roal veur een ander stuk grond, en niet in de laaste plaase deur de vast oldend ‘eid van de jonges van BEB, “beskarming arfgoed brunnepe”, en de stichting die de buurte op e richt ef um det stukkien brunnepe gruun te ‘oaln, Pette of veur jullie. Maar in beginsel was d’r al deur college en roadsmeerder’eid goedkeuring verleend um te bouwn. Anstoande donderdag kump dit onderwarp in de road an de orde, ik ópe det d’r een roadslid die die ’t college nog ies eempies fijn onder de neuze vreef det zij ’t niet bin die dit stukkien brunnpe redn, maar det ’t burger initiatief ‘ier zegeviert.
’t Is inmiddels twintig joar e leedn det ons zieken’uus e sleutn is, alle ellende die det ef veroorzaakt in de stad leg varre achter ons, Ik ‘eb altied veule van ’t reiln en zeiln mee e kreegn ,mien weder ‘elfte ef d’r joarn e warkt , maar gelukkig bin de stof wolkn inmiddels op e trokkn, en op zoaterdag 21 november is d’r een reunie van medewarkers van ’t veurmalige stads zieken’uus, georganiseerd deur Jeroen Franssen de toenmalige kok. Veur zovarre ik geinformeerd bin is d’r een kladde belangstelling, en det is fijn veur Jeroen en veur alle deelnemers. Ik mag liedn det ook ‘ier (um in de beeldspraak te bliem) de tied alle wondn ef e ‘eelt, want ’t was veur iedere die d’r bi’j betrokkn was een beroerde periode.
En zo ziej maar weer, d’r is altied wel wat in disse stad.
Appien Floep
Tweeduizendzeventien | donderdag 29 oktober 2015 11:31