Zakt in de geute,’t is inmiddels bi’jnoa zes joar ‘eleedn det de road via een mosie ef besleutn det d’r een roads enquette mos koom over ‘t grondbank dosjee, een ingewikkelde zaak die de gemeente een kladde geld, zo’n tien miljoen euro’s ef e kost.
Maar we bin noa al die joarn nog gien steek varder en ’t is nog steeds niet dudeli’jk oe ’t now precies in menare zit. Wet’older Albert Holtland mag now op koom draavn umme dudeli’jk eid te verskaffn. Maar buutn det liekt ‘t ‘r niet op det de roads enquette alsnog wordt in e zet umdet de road vindt det d’r al twee keer een andere road is an e treedn, en de ‘oofdrolspeulers al lange van ’t toneel bin verdween. ’t Is wel makkeli’jk um oe d’r zo met een Jantje van Leiden van of te maakn, ’t giet uuteindeli’jk niet um een pakkien botter, ’t giet um tien miljoen.
As de road zo met alle roadsbesluutn uut ’t verleedn umme zol goan, dan kuj de road ook wel noa ‘uus stuurn.
Een ander dossier zoj op een zelfde menier kunn benaadrn, zowat drie ‘onderd binnenstad bewoners die op eigen arf kunn parkeern dreigen ‘un parkeer vergunning kwiet te raakn. Maar ondank dat ook ‘ier opgiet det d’r al twee keer een andere road is an e treedn woarvan toenmalig wet’older Pieter Treep de initiatief nemer was, want ook íer bin de ‘oofdrol speulers al lange van ’t toneel verdween.
Maar det giet wel deur doar muj maar wel op rekenen. As inmiddels niet roker maar as een telg uut een sigarenmakers femilie ek nog altied een zwak veur een goeie segare, en al’oewel ik d’r gien ene meer op zal steekn vinn ik ze nog altied lekker roekn. Maar goeie segaarn ‘eurn niet in een bule maar in een ceder ólten kissien, det is buutn kijf. En det ’t kabinet now ook nog weer wil probeern um det um zeep te ‘elpn, ‘oe varre mutn we now eigenli’jk goan.
Een segare roker kuj niet varregeliekn met sigarettn of sjek rokers, een segare roker kan al dan niet onder ’t genot van een borreltien en een goed gespek merakels genietn van een goeie segare, en ik vin ook daj ze niet muttn veroordeeln as verslaafdn, loat die mensn. Kampen en segaarn eurn as industrieel arfgoed bij menare net zoas de steur en de Kamper- Ui bi’j Kampen eurn ’t zol niet zo gek weezn as de lokale politiek zich ‘ier ‘ard veur giet maakn, want ‘oe dan ook ze muttn van ’t ceder óltn kissien ofbliem, een goeie segare eurt niet in een papiern bule det slót elemoale nargns op.
De femilie Diender en de “Skele”, det is een begrip in Kampen, maar noa vier en tachtig joar kump doar een ende an, maar gelukkig blef ”café de Unie”, det is de deftige name van de Skele an de Iesselkante gewoon bestoan. D’r bin opvolgers e vunn in de femile Kranenburg en we goan d’r maar van uut det alles blef zoas ’t is, ’t kan niet missn want zelfs ’t recept van de beroemde balle gak neem ze mee.
Rein en Yvonne neem ofskeid van de vaste klantn op zundagmiddag 27 oktober. En zo ziej maar weer d’r is altied wel wat in disse stad.
Appien Floep
