't Is maar wat in disse stad

Ie kunn de krante niet los sloan of 't Is al ‘oogwatergeule en Reevedorp wat de klokke slot, veur en teegn standers bliemm over mekare ene rolln. Maar de rolle die burgemeester Koelewijn speult is op zien zachts gezegd wat merkwaardig. Eij twiefeld an de beslissing van de Raad van State, de bestuurs rechter oeft niet op de stoel van de bestuurders te goan zittn, aldus de burgemeester. Bovendien zeg ie det Kampen niet allenig op wil dreien veur de schade die wordt e leedn deur 't schrappn van Reevedorp. Now dut ie net of 't rijk bedacht ef um Reevedorp te bouwn. En det is echt niet zo, 't is de road van Kampen, weet ie't nog, achtiene veur en dartiene teegn, achttiene die noa alle waarskouwingn een grote broek an em e trokkn um elf ‘onderd dure úzen langs de watergeule an de man te brengn.

En now gef de Raad van State alle tegenstanders die det al joarn e roepn em geliek, en now reert Koelewijn krokedille troann. Onze burgemeester ef ook altied burger participasie veur in de mond, besluutn muttn steunn op een breed draagvlak. Maar as d'r één dosjee is wat niet kan boogn op breed draagvlak dan is ‘t wel Iesseldelta zuid. Wet'older Velthoen eb ik in twee duzend dartiene ooit ies eurn zeggn, as we 't now nog mozzn doen dan begunn we d'r waarskijnli'jk niet an. Toegeem wi'j em 't niet goed e doan is veur politici iets wat niet in un agenda veur kump doar em ze merakels veule muuite mee. Ik eb nog ies weer opni'j an een onafhankeli'jke water deskundige e vroagd wat eij d'r van vund, en net as de veurige keer blef ie zeggn, d'r bin op zes plekkn in de Iessel al zoveule maatregeln e troffn, en as ze eindeli'jk ies weer goan baggern bi'j Kampen wat ze joarn em noa e loatn dan is de óogwater geule niet meer neudig veur de waterpeil reduksie, boomdien giet 't pas speuln as d'r achtien duzend kuub water per seconde Nederland binn kump, en of det ooit gebeurt doar bin de deskundign 't ook niet over eens. Kortumme 't college en een roadsmeerder'eid em nooit willn luustern noa onafhankeli'jke deskundign, ook de jonges van de Zwartendiek en de club van Bye bye byepass bin nooit serieus e neumm. Wees now ies flink en geef toe daj saamt een verkeerde beslissing em e neum en respecteer de Raad van State.

Ach en toch bin d'r ook wel ies weer leuke dingn, de burgers kriegn een stemme in 't ni'je petret van de Koning det in 't olde stad'uus an de Oldestroate mut koom te ‘angn, ik eb begreepn det niet iedere d'r eem bli'j mee is, want de kunstkenners em now één keer een andere smaak dan 't gewone volk. En doarumme bin ik zo bli'j det 't gewone volk een stemme kreg want goa maar ies kieken noa 't petret van inmiddels prinses Beatrix in 't olde stadúus een creatie van allenig kunstkenners, zelfs Prins Claus skruk zich 't apezoer toen ie een keer op bezuuk in Kampen was, is dit mien vrouwe zeeg ie. En now wik echt niet de zoerproeme uut'angn, maar ik ‘ope det 't gewone volk een dergeli'jk skilderi'je van de Koning wet te veurkoom. En zo ziej maar weer, d'r is altied wel wat in disse stad.?appien Floep