Zakt in de geute, over ’t algemeen zit ik meestal niet um woordn verleegn, maar van de weke ging ’t bepaold niet van een leien dakkien. Ik zatte met mien kammeroad teegn over iemand uut Groningen, ei’j woont in de buurte van Eelde, wi’j zattn wat te moppern over vliegveld Lelystad, of det now wel of niet een goeie zaak is, ei’j keek ons an en vroeg koom jullie soms uut Lelystad, nee as uut ene mond, wi’j koomm uut Kampen.
En toen kwam ‘t, wat zeurn jullie now toch, Groningen ef een vliegveld, Amsterdam ef een vliegveld, Rotterdam ef een vliegveld, Eindhoven ef een vliegveld, Maastricht ef een vliegveld, en now d’r in Lelystad een vliegveld kump now is de wereld te klein. Ei’j vun det alleent mensen die niet vliegn recht van spreekn em, iederene die in een vliegtuug stapt en met vakansie giet die wet zeeg ie daj niet met zien alln op Schiphol terechte kunn.
't werd uuteindeli’jk een discussie woarin we ‘em niet konn overtuugn van onze argumentn, we em saamt nog maar een kop koffie e drunkn en bin vriendeli’jk uut mekare e goan. En al ‘oewel ik nog steeds niet stoa te juichn um een vliegveld in de achtertuin te kriegn, bin ik d’r toch wat genuanceerder over goan denkn, ei’j ád netuurli’jk wel een klein bietien geliek.
Ik durve ’t oast niet te zeggn maar ik goa met mien Rietje een weke noa de zunne, we vliegn maar één keer per joar, en we vliegn van of Schiphol, en ik bin d’r oprecht nog niet uut of wi’j ons now verlicht mut vuuln of bezwoard.
Wat is d’r in ons digitale tiedpark in korte tied toch een kladde veranderd, koom ik veur een paar weekn terug op een moandag morrn bij de ING bank an de olde stroate, ”’t olde postkantoor”, is de bank op moandag dichte. Krieg ik vri’jdag een brief in de busse de INGbank in Kampen giet elemoale dicht, veur oe bank zaakn muj in de toekomst noa Zwolle. En ’t zal allemoale wel neudig weezn maar ’t was wel eem slikkn, we bin een stad van meer dan vieftig duzend inwoners die noast de kunst accademie en de jounalistn skole ook dit soort veurzieningn goan verliezn, ’t dut mien kamper gien goed um geleideli’k an steeds meer kwiet raakn an Zwolle.
Onze burgemeester Bort Koelewijn, 66 joar, is nog lange niet van plan um weg te goan, ’t bevalt ‘m nog merakels goed in Kampen, ei’j blef nog een poosien zeg ie, zien droom is nog altied det Kampen Maastricht an de Iessel mut worrn, maar det is wel een ‘ele futuristische droom, want det bourgondische van Maastricht zulln wi’j wel nooit kriegn, en ik wete ook niet of we doar op zittn te wachtn, want um maar ies een veurbeeld te nuum, onze carnavals vereniging is noa joarn bestoan ter ziele e goan, dus zo bourgondisch bin we niet, maar ’t is fijn aj as burgemeester nog wat te droomm em.
En ‘t motto waorop ie de koomde joarn mee varder wil goan kump mien wel zeer bekend veur, ’t klinkt mien as muziek in de oorn want zeg ie, "d’r is altied wel wat in disse stad”. En geliek ef ie.
Appien Floep.
