Stikt de buule!

(door Henk de Koning)
Dark Toestebolte is veur ‘et eerst van zien leemm de beddestee uut'evlucht. 't Wier ‘em te ‘iete tussen de mannufactuurn van de echtelukke sponde,' bekenn ie mien. Drieka zien vrouwe was met de buurvrouwe noa de film ‘Vieftig tinten Gries' in Kampm' ‘ewest. En det ‘zeg ik oe,' verzekeren Dark mien met skrik in de oogn, ‘ik kenne mien eign Drieka in de beddestee niet weerumme!' ‘Seks in de City,' kirren ze met de klompm an veur ‘et geluud bedde in. Zo gries ‘ef ze ‘et nog nooit ‘emaakt.'

Allemoale de skuld van Wendy Vogelzang, de boazinne van de Kamper bioscope. Vrogger ‘et City Theater, maar now as ‘Movie Unlimited' umme'doopt. A'j Kampenaarn deurnoa vroagn goan ze metene de Tom-Tom anzetn. Umme de moand horganiseert Wendy een veurstellink in Movie Unlimited. Speciaal veur ‘et vrouwvolk van Kampm det achter de stofzoeger droomt van een prins op ‘et witte peerd. En slut de klok dan 12 uur stiet toch Gait op zien brommer weer veur de deure. ‘Is ‘t eten al kleur?!'

‘Viefig tintn Gries' sting now op ‘et pregramma van de speciale ‘Ladies Night'in Kampm. ‘t Vrouwvolk sting te dringen veur de deure van de bioscope.‘Ik begriepe niet wat in ‘et zwakke geslacht is ervaarn,' klaagn Dark. ‘An de ene kante opkoomm veur de ‘Blijf van mijn Lijf-‘uuzen en an de andere kante, veur de lekkerte, menare met een suukerbiette veur de konte slaon... Probeert deur as man nog maar ies zuukela van te maakn!'

De op'ezweepte vrouwen kwaamm in de ‘Unlimited' niks tekurt. Deur zurgen Wendy Vogelzang - veur disse keer Wendy Vögelen - wel veur. In de pauze van al det gries trakteern ze de dames op een leemsechte stripper. Vrogger in de pauze van een spannende film ‘aaln ie een reepien zuukela an de kassa van de City. ‘Alle oogn ‘ericht op Kwatta,' ‘ietn det toen. ‘A'j de dames now mutn zien kiekn noa die strippende Kwatta-soldoate...! En det zeg ik er bi'j: niks gien gebreukn geweertien!

Ander ni'js.‘Reijer van 't Hul kan op'oln met gruspoln gooi'jen noa de gemeente!' Zo reageern de vri'j willigers op de Koggewarf op ‘et bizundere bericht det ‘et bouwen van 1300 luxe woninks in ‘et netuurgebied van de Zwartndiek niet deurgiet. Ook ‘et graamm van de bypas van de IEssel noa de randmeern giet mogeluk niet deur. De Raad van State ‘ef deur as ‘eugste rechtsorgaan veurlopig een dikke strepe deur ‘ezet. Bart Zeven, Hans Houkema, Bert Jansen en Hanjo Eijkhout bin deur saamt met Reijer de belangriekste anstichters van. Ook Ine Nagelmaker en old wet'older Arend Hengeveld knokten dapper mee. As Stichting Warkgroep Zwartendiek dienen ze al vrog bezweurskriften in bi'j de Raad van State. Ook wel zo slim onderbouwd det de hadvocoatn van de minister met de bek vol tanden stingen. Meer kronen op ‘et wark van die kante zaa'j ook niet!

De Kamper haksievoervoerders verzetn zich veural teegn de bouw van de dure woninks in ‘et skitterend netuurgebied van de Zwartndiek. 't Zat de haksiegroep eerst niet mee want zelfs de PvdA-wet'older in die tied was veur de bouw van peperdure luxe woninks an de Zwartendiek. Volgens Reijer was de wet'older eemm zien sosjale blikveld kwiet. ‘Inplaas van zien rooje brille ‘ad ie de metselbrille van de VVD in de road van toafel ‘epakt. Eem een verkeerde grepe! Zukke ongelukkies gebeurn in de polletiek, maar 't zol bekant ten koste goan van de netuur an de Zwartndiek! ‘De bi'jpas as zodanig ‘ef onze zeegn as die ofwatering van de IEssel noa de Randmeern maar netuurvrindeluk blef zonder druk verkeer van allemoale jachies,' waarskouwen Reijer. A'j ‘em zuukn, 't is umsko deur met die grieze beurd en det triomfantelukke lachien op zien gezichte...

Ken ie trouwens onze stadgenoot Henk Jans? 't Was veur mien een compleet onbekende. Tut ie zich in een brief an mien hopenbaarn. As musicus en tekstdichter van een kladde mooie liedties.‘Ier een kopie van ‘et deur mien ‘eskreemm lied ‘Jannus de Bloaze,' berichten ie mien. ‘t Is veur ‘et eerst det de droeve lotgevaln van Jannus de Bloaze as complete meezinger op pampier bin ‘ezet. Want deur ontbrak ‘et altoos nog an. Al is iedere geaard Kampenaar wel bekend met Jannus de Bloaze as meezinger. Maar dan enkelt vanuut ‘et refrein en ook enkelt maar een paar zinnegies. Skoef de zundagsclausule an de kante, zet de Jan Doedel op toafel en ie kenn de Kampenaar niet werumme as ie noa wat slukkies luudkeels anvangt: ‘Op 't Uukien van de ‘Eiligerstege.... Deur ‘ef ies een standbeeld ‘estoan. ‘Et standbeeld van Jannus de Blaoze. Die is noa de bliksem ‘egoan...'

In de uutvoerink van Henk Jans tref ie Jannus de Bloaze in zien stamcafeegien de ‘Veilige Haven.' Die name bedacht Jans in zien tekst umme reden det ie ‘et zo mooi ironisch vun klinkn. Want ie weetn: ‘Drank verslindt, wat arbeid wint!' De kroegboas ‘ad er skik van op zien tap een rij burrelties as lokoas neer te zetn. De drinkebroers konden die gratis opzoepm as ze, achtersteveurn op een stoelle ‘ezeetn, as ruiters te peerd, er op of hobbelden. ‘De jenever-cavalerie,' wier det ‘enuumd. Die ‘ef in Kampm wel degeluk bestoan. Enkelt in een ander plaaseluk cafeegien.

‘Maar,' zo meldt Henk Jans opgewekt in zien dranklied, ‘noa bi'j ‘et cavaleriezoepm weer ies zweur an de winst bin ‘ewest, kwam Jannus, op weg noa ‘uus, peutien-over, bi'j de Bloasekolke an de Venediek terechte. ‘Deur is ‘ei bezeupm verzeupm!' De kolk ‘iet sinds die tied de ‘Bloasekolke.' Mogeluk uut eerbetoon an Jannus? Een standbeeld, weurvan ‘et drinklied sprek, is er veur Jannus de Bloaze nooit ‘ekoomm. Of ‘et mut weezn ‘et refrein det in Kampm altoos weer boomm water kump as de glaasies met Jan Doedel vol bin en de gasten in koor galpen: ‘Jannus, o Jannus, ‘ei is noa de bliksen ‘egoan, ‘egoan...!' Ik ‘eure ‘et de Kamper Koggezangers over twee jeur op de Internasjonale Hanzedaagn al zingn. Nao flink wat oorlams natuurluk.... Det sprek!

Allo, Hendrik