De Kamper kogge is weer veilig thuus van zien avontuurlukke ‘Ommelandveurt. Een skitterende prestasie van onze Kampenaarn die er, net as in de middeleeuwen, in slaagn met een zweur ‘olten skip ‘Umme ‘et land’ ‘ene te vaarn. Det wil zègn umme ‘et noordelukste puntien van Denemarken. Een gewoagde en avontuurlukke reize over zee umme dieppe oe pette veur of te neemm. Net as vrogger de eerste kustvaarders een kladde kolde, weinig sloap en zeeziekte deurmakend.
De Kamper kogge wel ook met ervaarn skippers an boord, maar veur de rest veurnameluk ‘et avontuur angoand met enthousiaste vrijwilligers van de stichting ‘Kamper Kogge’. Een stoer stellegien det deur ‘et gemeentebestuur van ‘et Duitse Lübeck was ‘evroagd met de kogge ‘et Hanzefestival in die stad te koomm opsiern. De stad weur rond de dartiende eeuw ‘et handelsverbond van de internasjonale Hanzesteden begun en weur Kampm sinds die tied lid van is. Sterk volk det van de Kamper kogge. Neemm now roerganger Henk van der Kamp mee op Ommelandveurt. Kreeg bi’j ‘oge zeegang een optater van de ‘elmstok, maar met een bult veur de kop as een doeve-ei bedaard opmarken: ‘Beter zo, as stille zitn,- want a’j niet beweegn, verstief ie!’
Op weg noa Lübeck zat ‘et pechduveltien de bemanning van de Kamper kogge eerst gemeen teegn. Al kurt noa vertrek uut Kampm weigeren ‘et navigasiesysteem. Det repereern kosten twee daagn op’ont’old in Harlingen. Zweur weer met wind uut de verkeerde ‘oek zurgen nog ies veur twee daagn ‘verwei’jd’ tiedverlies op Terschelling. Kassa veur ‘et eiland det van die noodstop van de kogge mooi profiteern, deur 1.55 euro toeristenbelasting per dag per bemannigslid te beurn. Bemanningslid Reijer van ’t Hul rij’jen zich deur zo merakels an det in zien logboek ‘ellug noteern: ‘Dan te weetn det de Kamper kogge met ‘open skip’ de borgerij van Terschelling gastvri’j ontving en deurmee zelf een grootste toeristische hattraksie van ‘et eiland betekenen.’ Maar ’t slimste mos nog koomm... Op zee met 12 man an de bruune boonn umme er achter mutn koomm det de waterpompe van ‘et skeepstwelet ‘et onverwacht niet dut. Deur zoveule teegnslag tegeliekke spann ‘et er eemm umme of de kogge wel op tied ‘et Hanzefestival in Lübeck zol ‘aaln. Det lukken kantien boord deur rap van koers te veranderen en via ‘et Kielerkanaal een kurtere weg te neemm.
Maar druk met stuurn en zeiln, vergaatn de Kampenaarn de Kieler hautoriteitn te melden det ze van die speciale deurvaart gebruuk maakten. Een begriepelukke vergissink bi’j alle inspannink zo’n bizunder skip as de kogge goed in de veurt te ‘oln, maar met Duitse Gründlichkeit de Kampenaarn toch vette boete kwam te stoan. Reijer meppen metene weerumme. ‘Is det de oende wel?’ riep ie ‘ellug vanof dek, wiezend noa de fietse weurop de agent van de Kielerpliesie de kogge kwam bekeurn. Een gemoffeld barrel, weurin Reijer, noa zien zègn, nog duudeluk de spoorn van een deurtrapper uut 1945 uut de zake van Fikse an de Oldestraote menen te herkenn. ‘As ie die bon verskeurn loaten wi’j det van die fietsen uut de krieg rusten,’ beud Reijer de agent, bi’jwieze van nog een stukkien ‘Wiederutmachung’, vergevingsgezind an. Maar de Sicherheitsbeamte reageern niet of Reijer zien Duits mut, as ie ‘ellig is, teveule op Kampers liekn. Wat op de ‘eenreize niet lukn, lukn op de terugreize wel: rond Denemarken weer op Kampm op an. Deurmee wier de Ommelandveurt veur Kampm toch nog een deursloand succes. Fier zeiland op de IEssel was ‘et stoere skip weer thuus. Met ruum 600 km op zee in zien kielzog, maar toch met de bedaarde uutstralink of ie enkelt eemm ‘een en weerumme noa Urk was ‘ewest. Mooi wark Kamper Koggerikken! Maar ’t leemm giet deur!
En net a’j det denkn rup de gemeente met een pagina-grote hadvertensie: ‘Goed umme ies stille stoan bi’j de weke van de begraafplaase!’ Een boodskap vol skrijnend leed, op’esierd met foto’s van zerken. In bizunder det van een kiendergraffien, veurzien van speulse vlinderties en een teddiebeertien, andoenluk rustend teegn de grafstene want de boodskap mut duudeluk overkoomm. De 650 Euro hadvertensiekosten betaald door ons allemoale, gezien ‘et logo van de gemeente, breeduut of’edrukt tussen de grafsteenn. ‘Begraamm? Vrogge of late krie’j er mee te maakn!’ dut de hadvertensie een diepgraamd beroep op oe intellegensie. En umme reden det hoop dut leemm de tekst: ‘De Weke van Begraafplaasen begint een tradisie te wurn.’ ‘Ook mu’j volgens de hadvertensie-boodskap de uutstappies noa de begraafplaasen niet al te donker inzien, gezien de uutleg: ‘De Weke van de Begraafplaase stiet ‘eel die tied in de skienwarpers!’ ‘Leemslicht uut, spotlicht an!’ rup Jannus Flapuut, die een begraafplaase niet uut de weg giet, maar zelf veurstander is van wat ie nuumt: ‘Krepeern.’
Genog te beleemm ook tussen de graven. ‘Met hactiviteitn as lezingks en herrinnerings-oams, plus de topper op de begraafplaase van de Zandbarrug een historische rondleidink,’ aldus de boodskap. ‘Kump ‘et verleden weer tut leemm,’ mut de opsteller van de hadvertensie wel ‘edacht’em... Bi’j nog twiefel tussen een daggien Lehmkoelle in Wezep of een weke begraafplaase in Kampm, lokt de hadvertensie met spannende workshops over wat begraamm in’olt en met nuttige informasie over de liggingk van de graamm. Voorts krie’j uutleg wat de mogeluk’eden bin van wolwassen graamm, urnen-graamm, urnen-nissen en strooivelden.’ Jannus Flapuut verzun deur, noa ofloop, saamt cake bakn in de aula nog bi’j. De Rotary van de Stadsbrugge verbazen zich det soort berichtgevink. Kranten ‘em ‘et muu’jluk, maar ze met brakke taal in droeve hadvertensies bi’jvoern gef te denkn. Ook an de oprecht’eid van de meelevende oproep valt te twiefelen. De dipsaus van de commercie drup er met ‘et logo van de gemeente en de bedrijfsmatige medewarking van een bekende uutvaartbegeleiding teveule van af. De gemeente ‘ad die 650 euro advertensiekosten beter kunn besteden. Bi’jveurbeeld deur de wegbezuunigde borders van ‘et Kamper plantsoen weer met bluumegies leemsbli’j op te siern. Loat de begraafplaasen liever met rust!
‘Allo, Hendrik
