Stikt de buule!
Klop op de deure van de borgemeesterskamer.
Borgemeester (verstoord): ‘Binne!’
Veldwachter Bromsnurre kump binn (salueert): ‘Gehoorzaam beleefd, borgemeester. Ik bin ‘t, veldwachter Bromsnurre.
Borgemeester (geargerd): ‘Det zie ‘k Brom. Ie bin ‘ier kiend an ‘uus. Wat ei’j op oe lever?’
Brom: ’t Is meer op mien kop, borgemeester. Det wil zègn, de pliesiepette op mien kop. Kats versleetn.’
(De veldwachter teunt de borgemeester zien gerafelde pliesiepette ): ‘Al tien jeur dienstbaar op mien kop, maar an alles kump een ende. Kiek, de kleppe zit lus, de veerkracht is er uut en de voeringk zakt mien permenent veur de oogn a’k ies een tertoerist achternoa zitte.’
Borgemeester: ‘Terrorist, zu’j bedoeln. Maar wat die pliesiepette angiet...enkelt een bietien verskeutn, ja.... Maar een compleet ni’je pliesiepette....? In disse tied, now alle gemeentes mutn bezuunigen?’
Bromsnurre: ‘Zeg det wel. Det zie ‘k ook an ons mooie plantsoen. Alle bloemm uut de borders wegbezuunigd. Mooi pech veur al die duuzenden die binnkurt op de Internasjonale Hanzedaagn in Kampm ofkoomm. ‘Olland, bloemmland! Muj niet Kampm wezen. Of ie mutn ‘et asielzuukerskamp, vlak bi’j, an de Roggebot bedoeln. Afrikaanties gien gebrek!’
Borgemeester: ‘Ie munn wat over ‘em veur oe medemens in nood, Brom. Wi’j dan maar een tandtien minder. Deurumme, wat pliesiepette angiet, die stiet oe nog best.’
Bromsnurre (de borgemeester zien vergupte pliesiepette anreikend): ‘Prebeert uwes edelachtbare ‘em dan ies.’
(As de borgemeester de pliesiepette wil opzetn, valt de kleppe op de vloere. De uut’elubberde pette zonder kleppe zakt de borgervader dieppe veur de oogn.)
Bromsnurre (zegeviernd): ‘Now, wat zei ik oe?!’
Borgemeester (de pette rap weer ofzettend): ‘Det mu’k toegeemm, rek zat. Meer meer in die pette van oe as in de gemeentebegrotink. Maar zonder kleppe wel een pette met inzicht.’
Bromsnurre: ‘Misskien wat veur de gemeenteroad?
Borgemeester: (de veldwachter weer zien pette anreikend): ‘Let op oe woorden, Brom.
Bromsnurre: ‘Ja, wat wilt uwes as borgemeester? Een veldwachter met meer of minder pette? Graag de kleppe nog, borgemeester. Noast oe op vloere!’
Borgemeester: (de lusse kleppe van de vloere oprapend): ‘Ku’j wel plakn, Brom. De kleppe an oe pette.’
Brom (verongeliekt): Met speeje zekers! Da’s de goedkoopste maniere.’
Borgemeester: ‘Ik begriepe oe teleurstellink, Brom. Maar as gemeente stoan wi’j veur de muujlukke opgave alle implicasies intervensies budgetair neutraal te maakn.’
Brom: ‘Mooi ‘ezegd, borgemeester. De bek zol mien skeve stoan. A’j ‘et zingen ku’j liniaal rectum bi’j ‘et mankoor van DEV. Niet deur ‘Eendracht’, maar ‘Deur Eenvoud Verbunden!’ Best det de gemeente mut bezuunigen, maar weurumme pen sé met mien pette beginn?’
Borgemeester: ‘Een kwestie van testueern, Brom.
Brom(verbaasd): ‘Testueern?! Is det Kampers veur de mosie van wantrouwen teegn een Steur?’
Borgemeester: (geargerd): ‘Van der Steur zu’j bedoeln, Brom. Maar vertelt ies, a’k oe zo ‘eure, ei’j ze wel allemoale op een rijgien Brom?’
Bromsnurre (opgewekt): ‘Zekers, borgemeester. Alle zeumm. Maar wel kleinties, zeg mien vrouwe.’
Borgemeester (verzucht): ‘De feitn, Brom, de feitn. Deur giet ‘et umme! En wat bin die?!’
Brom ( de vinger opstekend): ‘Da’j een veldwachter niet met een versleetn pliesiepette de stroate opstuurn! Det ondermijnt ‘et gezag!’
Borgemeester (zuchtend): Gezag, Brom, det mu’j uutstraaln! Uut oe eigenst! Niet met wat a’j op de kop zetn!’
Bromsnurre (bedachtzaam): Maar van de winter zaa’k oe toch vake met een ‘oed op. En niet zo’n skarminkelug kleintien ook! Want ik dachte nog: zunde det de borgemeester zien netuurluk gezag zo tekurt dut deur met zo’n ‘oed op de ko...op ‘t ‘eufd zich an ‘et volk te verteunn! Eerst a’j ‘em ofzetn was ’t net of de zunne deurbrak!’
Borgemeester: ‘Ja, zo kan ie wel Brom. ‘t Giet er now umme det de borger zien verantwoordeluk’eid nemp. Dan ook kan de gemeente moatwark te leveren.’
Brom (bezurgd): ‘Wat bedoel ie det, moatwark? Alles lup teegnswoordig uut de moate! Asielzuukers mutn er uut, de Oekraïne maag er niet in en goa’j met een referendum niet stemm, stemm ie toch! Ik denke vake, weur giet det op an?!’
Borgemeester. ‘Niet zo muujluk Brom, as gemeente ‘em wi’j deur ‘et Kamper Kompas veur. Eemm de cocreasie-coördinoatn invoern en metene weet ie uut wat veur richtingk ‘et Rijk met ni’je stukm kump anzetn.’
Bromsnurre (bezurgd): ‘Uut ‘et zuudwesten met zinkstukken. Reken deur maar op...’
Borgemeester: ‘Ik begriepe da’j ‘et niet begriepm, Brom. Maar as gemeente mutn wi’j er veur zurgen det ‘et tempo van de landeluk op’elegde bezuunigingks evenwichtig wurdt deur’evoerd in combinasie met de overgank van een ‘istorisch noa een objectief verdeelmiddel. Det begriep ie toch?’
Bromsnurre (knipperend met de oogn): ‘Misskien a’j ‘et zingen!’
Borgemeester:‘t Is dudeluk det wi’j as stadsbestuurders niet magn struukelen over de finansjeele taakstellinks die ‘et Rijk ons plenair opleg.’
Bromsnurre: ‘Zekers borgemeester en ik warke deur graag pleenair aan mee. Ik bedoelle: da’j niet struukelen. Maar ik ‘ebbe zo mien eign kopzurgen. Een ni’je pliesiepette, bi’j veurbeeld!’ Maar wacht ies, ik vroage mien vrouwe wel een warme musse veur ons te brei’jen. Wei’jt oe in de sturm van de bezuuniginks dan de ‘oed of, ku’j altoos nog de gebreide musse van mien Marta opzetn. Mu’k wel wat wolle kunn declareern.’
Borgemeester: ‘Twee bullegies kan de gemeentebegrotink wel lieden, Brom. Dan maar een deesien minder bi’j de koffie in de gemeenteroad. Toch ‘ef Kampm nog niks te klaagn met een 33-ste plaase op de landelukke lieste van noadeelgemeentes.’
Bromsnurre: ‘En probleemm lussen wi’j saamt onder de gebreide musse wel op borgemeester. Zetn wi’j op de miende voluut ‘veldwachter’; op de oende enkelt de ‘h’ van hautoriteit. Skeelt weer wolle. Now edelachtbare, ik stappe maar weer ies op. De plicht rup!’
Borgemeester: ‘Doe det, Brom, maar vergete oe pette niet!’
Bromsnurre:‘Bewaart die maar borgemeester. Veur in de vitrine van ‘et Stedeluk Museum.‘Ef Kampm toch nog wat fleurigs in petto met de Internasjonale Hanzedaagn. Ik ‘olle ‘et bi’j mien Marta d’r musse...
Ajuus, Hendrik
PS: A’j de berichtn magn geleumm ‘ef ook de premier van IJsland een vermogen an belasting ontdeukn deur al zien zakgeld noa Panama weg te sluuzen. ‘Ko’j verwachten van een premier uut Rijkjavik...,’ rup Jannus Flapuut.
