(door Henk de Koning)
Stikt de buule!
De IEsselkogge is boomm water zunder deur te zakn. Det kan’k van mien keerl niet zègn as ie weer ies bi’j Skele Jannus mooi an de Heinekus is ‘ewest,’ sprak Janna, de vrouwe van Jannus Flapuut. Wi’j van de Rotary van de Stadsbrugge neemm dieppe de pette of veur Rijkswaterstaat, die er op meesterlukke wieze in slaagn ‘et eeuwenolde koggewrak in de IEssel bi’j Kampm boomm water te ‘aaln. En ook net zo gaaf as ie is ‘evunden. Een waterstaatkundige prestasie van de boomste planke. Wouter Waldus, die de ganse hoperasie leiden, pinken ontroerd een treuntien weg, toen ‘et kuppien van zien troetelkiend skitterend teveurskien kwam. ‘Ik ‘adde ‘et gevuul da’k weer verliefd waare,’ bekenn burgemeester Bort Koelewijn op zien beurte al eemm ontroerd. Mooi ‘espreukn van de borgemeester’, zeeg Jannus Flapuut, ‘maar volgens mien is Bort niet enkelt verliefd op de IEsselkogge, maar er ook mee ‘etrouwd. Want onze borgemeester stiet er mee op en giet er mee noa bèdde.’ Pette of ook veur de kladde vrijwilligers van de stichting ‘Kamper Kogge’, die zich op de koggewarf ‘et vuur uut de sloffen liepm, umme ‘et spectakel van de barging veur een groot pebliek tut een onvergetelukke belevenis te maakn. De pars, van overal vandoande, wier in de watn ‘elegd met snart, ge’aktbaln, koffe, thee, frisdrankn, gebakken-, en gerookte vissies. Kon zat want Rijkswaterstaat betaaln de kosten van de barging. ‘De IEsselkogge wier eerst nog op een ponton of’emeerd an de ka bi’j ‘et Van Heutszplein.
Eem kladde pebliek kon deur ‘et beroemde skeepswrak van dichtbi’j bewonderen. ‘Kiek maar ies goed, jonchen,’ wees een va zien zeune op ‘et ruum 600 jeur olde skeepswrak: ‘Ebouwd toen de 80-jeurige oorlog nog mos beginn!’ In een speciale tente op ‘et Van Heutszplein gaamm vri’jwilligers van de stichting tekst en uutleg an ‘et pebliek over de geskiedenis van de koggen. De menigte kon er niet genog van kriegn. Dan te weetn det ‘et offisjeel in Kampm heksposeern van de IEsselkogge nog mut beginn! Met ‘et stuurn van een, bekant niet te tiln, slagroomtaarte drukn ‘et gemeentebestuur van Kampen zien grote waarderink uut veur de uutgebreide inzet van de vri’jwilligers. ‘Et collesjie deed er een briefien bi’j : ‘Een taarte veur jullie allemoale, die zich ‘ef ingespann rondumme ‘et lichten van de IEsselkogge.’ Met op de taarte een ofbeeldink van de IEsselkogge. Kees uut de warkplaase skeuf metene een groot burd met ook zien lege broodtrummel. Noast ‘et lichten van de IEsselkogge viel er in Kampm nog meer te beleemm. ‘Et concertkoor ‘Immanuel’ bestiet 100 jeur! Det wier gevierd met een uutvoerink in de Borgwalkarke.
Compleet met old-koorleden as h’eregasten op gereserveerde karkbankn. Kussentien onder ’t gat as hekstra eerbewies.‘Et gewone volk mos met kale karkbankn genoegen neemm. ‘Ie zoln er een ‘olten konte van over’oln,’ klaagn Jan Rap in ’t Zadel. In de pauze ko’jt ‘et verskil dan ook goed marken. Die van de kussenties liepm er gemakkeluk bi’j, die van de kale bankn zaa’j met verkrampte biln noa de koffie op anskoemm. Borgemeester Bort Koelewijn was offisjeel present. Umme uut name van onze koning, ‘et jubilerend koor een bizundere onderskeidink uut te reiken: de Koninklukke Erepennink veur muzikale verdiensten. De 97 mann en vrouwen van ‘et koor waarn duudeluk verrast. De bek viel ze lus zonder da’j wat ‘eurn. ‘Wel bizunder veur een koor det net is underskeiden veur de speciale maniere weurop ze geluud voorde brengen ,’ marken Jannus Flapuut op. De borgemeester roemm in zien toepsprake de skitterende zangprestasies van ‘et jeurige koor. Een toesprake met een vrolukke neute. Beter nog as premier Mark Rutte in een dolle bui’je. A’j Harrie Poulssen, de dirigent van ‘et koor, mutn zien glunderen toen de borgemeester ‘et ni’js van de Koninklukke underskeidink bekend maakn. Kurt teveurn zaa’j nog niks an ‘em. Sting ie op zien gemakkien ‘et wark van de vroggere componist Hayden zo uutgebreid uut te lègn det ‘et volk in de karke verzuchtn: ‘Wurdt er now nog ‘ezungn, of niet?! Veurzitter Adriaan Kranenburg liep een bietien raar noast zien skoenn te stapm. Van trots bleek later.
Begriepeluk want ‘et jeurige koor ontving die oamd nóg een mooie underskeidink. Die van de Koninklijke Christelukke Zangers Bond (KCZB), de overkoepelende horganisasie, weur ‘Immanuel’ bi’j is an’esleutn. De Bond beud ‘et koor een skitterend bronzen beeldtien an. Een jubileumgeskenk met de toepasselukke name: ‘Applaus’. De ruum tachtig-jeurige Truus Zielman-Pleijsier (al 65 jeur lid) mocht die welverdiende onderskeidink veur ‘haar’ ‘Immanuel’ in ontvangst te nemen. Toen begun ‘et koor te zingen. Gait van ’t Lange Ende wol meegalpm, maar Garre, zien vrouwe, purn ‘em metene zo gevuulige in de mage det Gait de rest van de oamd nog wel met ‘et koor de bek beweug, maar enkelt umme weer op hoasem te koomm. Meezingen met ‘Immanuel’ doe’j dan ook niet zomaar. Kump bi’j: Gait zingt zo vals as een kraaie en ook de betekenis van de woorden ontgiet ‘em vake. ‘Gait is diselektrisch,’ wet Dark Toestebolte. Vandeur ook det Gait ooit ies bi’j een karstzangdienst liniaal rectum de karke is uut’estuurd toen ‘et koor eerbiedug zung: ‘In de Hoge!’en Dark er vol overgave deur’ene galpen: ‘In de Noga!’Ook de ‘Golden Wiele-Waaln’, ‘et zangkoortien van de Rotary van de Stadsbrugge, ‘ef ooit ies een mooie subsidie mis’eloopm, umme reden det Gait in de anvroage er bi’j vermelden det de dirigent bekend sting as een bizundere alcoholist. Gait bedoeln: ‘Accordeonist! Die subsidie is onze neuze dan ook liniaal rectum veurbi’j ‘egoan. Bli’j dan ook det ‘Immanuel’ now zo mooi in de priezen is ‘evaln!
‘Allo Hendrik.
PS: De peurdersvereniging Kampm-IEsselmuuden-Genemuuden (KIJG) ‘ef in ‘et verenigingksgebouw ‘De Driester’ an de Kamperzeediek weer zien jeurvergadering gevierd. Opni’j een zaale vol. Ze bin now nog an ’t teln ‘oeveule gakbaln en schnitsels er die oamd deur bin ‘egoan...
de Koninklukke Erepennink was ‘et dan zovarre en trukn de koorleden alle registers van d’r golden keelties lus. Veurzitter Adriaan maar noast zien skoenn.
