(door Henk de Koning)
Dark Toestebolte is ‘et nij’je jeur lippend begunn. ’t Kwam deur de nei’jeurs-toesprake op ’t stad’uus van onze eingste borgemeester Bort Koelewijn. Gien borgemeester kan de mens’eid zo opgewekt veurbereiden op nog meer recessie-pienne as onze eignste Bort. ‘Ja, 2016 wurdt een spannend jeur,’ veurspeln ie de kladde Kampenaarn die ‘em en de wet’olders op ’t stad’uus kwaamm luksen. ‘Et collesjie sting an ‘etreden met vrouwlief erbi’j. Allemoale knappies op’edoft. De vrouwe van de borgemeester zag er wel éél bizunder knappies uut. Compleet met een een King Size ketting as sierroad umme.
De ambtsketen van Bort stak er bleekies bi’j of. Ku’j de oende beter niet ofdoen,’fluusteren de borgemeester zien vrouwe in ’t oor. Uuteindeluk bin ik ‘et opper’eufd ‘ier van de gemeente.’ ‘Doen ie de miende dan umme,’ beud ze Bort an, maar die weigeren, noa ruum zes jeur borgemeester van Kampm teveule vergruujd met zien eignste ketting. In zien toesprake wees de borgemeester in bizunder op de veranderinks in de zurg die gangs bin. Wel was ‘et gemeentebestuur volgens Bort goed bezig. ‘Et was bi’j die woorden det met een daverende klap de buutndeure van ‘et stad’uus dichte klapm De Kamper ondernemer en vrogger VVD-roadslid Bert Weever verliet recepsie. Zo ‘ellug as een spinne. ‘Eel begriepeluk,’ sprak Dark Toestebolte. ‘Bert ‘ef de boek vol van alle mooie woorden over borgers mutn saamwarkn met de gemeente. Buutn op parkeerplaase van ’t stad’uus ko’j Weever nog ‘eurn foeteren: ‘Ik kappe er mee! Ik bin er ‘elemoale kleur mee!’ riep ie, de voeste dreigend noa ‘et stad’uus zwei’jend.
Det kump: Bert is merakels te passe ‘ekoomm in de valkoelle van gemeentelukke veurskriften, wetties en bestemmingsplann. Zes jeur geleden besleut ie, saamt met een gruupien klega’s de stad een skitterend kedo te bezurgen; een ni’je kadekrane op de IEsselkade in de buurte van de Stadsbrugge. Net zo ene as bekant honderd jeur op die plekke ‘ef ‘estoan. Een zeldzaam mooi warktuug uut 1870, destieds ‘ebouwd deur de Skotse inzienjeur William Fairbairn. De krane viel op deur zien krumme, kokervurmige arm van smeediezer. Geskikt umme makkeluk zweure lasten uut kleinere skeepm te lussen. Later een beskarmd Rijksmonnement, maar in 1969 in Kampm veuruutstreemd of’ebreukn. Tweeje van die bizundere kranen ‘ef ons land now nog. Ene in Middelborrug en ene in Koog an de Zaan. Ie weetn, in 2017 koomm veur Kampm de Internasjonale Hanzedaagn er an.
Een feesteluk eerbewies an de vrachtveurt in relasie met Kampens rieke handelsverleden. Zekers 30.000 bezuukers wurn dan in Kampm verwacht. En wel uut gans Europa. ‘t Zol toch mooi wezen as teegn die tied ook die olderwetse Kamper kadekrane weer op zien olde plekke an de IEsselkante zol stoan,’ bedacht Bert Weever. Ook al is ’t een precies zo noa’emaakte. Saamt met een gruupien al net zo enthousiaste klega’s richten Weever de ‘Stichting Herbouw Kadekrane Campen’op. Noa 6 jeur veurbereidink zat die er now warkeluk an te koomm. Kosten: 180.000 euro. Betaald deur Kamper sponsors! Eemm nog de gemeente umme medewarking vroagn. Gemeente-ambtenaar bi’j loket SGB ( Saamwarking Gemeente Borgerij): ‘Zegt ‘et ies!’ Stichting Kadekrane: ‘Wi’j bin borgers van de gemeente Kampm en woln graag een vergunnink ‘et plaasen van een kadekrane an de Iesselkanten bi’j de Stadsbrugge. Een kedogien van ons an alle Kampenaarn.’ Hamptenaar: ‘Een kadekrane? Veur kranen mu’j trouwens bi’j ‘et leket waterleidink wezen.’ Stichting: ‘Nee, ho ies eemm. Een vergunning veur ‘et op de olde plekke magn plaasen van een ni’je olderwetse kadekrane.’
Saamwarkings-ambtenaar: ‘O zo’n krane! Stiet die er dan niet meer?’ Stichtink: ‘Nee, in 1969 al of’ebreukn.’ Ambtenaar: ‘’Oezo dett?’ Stichting: ‘Umme reden det in Kampm ‘et ofbreekn van monnumentale bouwwarken skienbaar makkelukker giet as er zuunig op wezen. Ie zien ’t an de vroggere klumpieskarke en de mooie olde bruggies in de Borgel. Ook as cultureel arfgoed of’ebreukn.’ Maar det leste pikn de dienaar van de gemeente niet. De man wier rood van ‘ellug’eid. ‘Det van de Borgel neem ie terug!’ blaffen ie. ‘Opbouwen giet de gemeente ook net zo goed of! Kiek maar noa die...eh...eh... woontoorn an de IEssel op het Barkterrein. Een zuuverder veurbeeld van Crazy-istische bouw in een beskarmd stadsgezichte vin ie narns anders ! En er koomm nog drieje van die crazy...eh...woontoorns bi’j.’ Stichting Kadekrane: ‘Een vergunnink graag veur ‘et plaasen van die krane!’ De ambtenaar bladeren in zien veurskriften lei de ondernemers uut det de vergunnink, compleet met zegel, de stichting 2500 euro kosten.
‘De wettelukke pries veur ‘et wijzigen van ‘et bestemmingplan op de plekke weur de krane mut koomm,’ lei de hambtenaar hampteluk uut. Bert Weever zol toen al bekant uut zien vel springen. Nog arger toen ie borgemeester op de nei’jeursrecepsie begun over ‘et vangnet van de gemeente in saamwarking met de veerkracht van de saamlevink.’ Veur Bert Weever ‘oeft die kade-krane niet meer. ‘Et deur de gemeente met 2500 euro belasten van een particulier initiatief van 180.000 euro, dut veur Weever principieel de deure dichte. ‘Dan maar gien krane!’ zo stiet zien persoonluk besluut vaste. Gelukkig det er ni’je onderhandelinks goande bin! Wel mut de stichting 2500 euro veur de vergunnink betaaln ‘maar’, zo fluusteren de gemeente de stichting in, ‘tegeliekke ku’j van ons ook subsidie kriegn as bi’j drage in de kosten krane. Zo ‘aal ie de pries van de vergunnnk er makkeluk weer uut!’ Ik bedoelle maar, misskien toch nog end goed al goed. Borgemeester Koelewijn zeeg ‘et al in in zien bemoedigende nei’jeurstoesprake: ’t Bin muujlukke tieden, maar zo saamt koomm wi’j er wel...
‘Allo, Hendrik
PS: Mien kammeroad en ere-lid van de Rotary van de Stadsbrugge Bert Toeter (in mien rebriek Bartus Pekel’erink), is overleden. Weer is Kampm een bizunder kiend armer. Bartus was een man van de netuur en ‘et water. Beroemd veural as vakkundig punterbouwer in zien skuure vlak bi’j ‘uus. Gastvri’j en groot lief’ebber van een zolte met look. Wi’j missen Bartus now al!
