Eij’t al ‘emarkt? Kampm wurdt sinds kurt bestuurd deur een ni’je gemeenteroad en een ni’j collezie van borgemeester en wet’olders. ‘Niet ‘emarkt nog?’ Toch bin ze al weer een mooi poosien gangs.‘Et collezie van borgemeester en wet’olders beloven de stad met ‘Ni’je Energie’ te goan bestuurn. Maar de polletiek en wat beloomm….’
Toch de moed er in’oln,’zeg Jannus Flapuut. De ni’je wet’olders? Met uutzundering van Geert Meijering van ‘et CDA, die een deurstart maakt, bin det: Jan Peter van der Sluis (Christen Unie), Albert Holtland (Gemeente Belang Kampen) en Irma van der Sloot (Gruun Links). De polletieke partij’jn, die de gemeenteroads-verkiezingks ‘em wunn, woln det weetn ook. De bodes op ’t stad’uus konden de taarties niet ansleepm. Elke wet’older zien eign taartien. ‘Verzin-een-list’,-Tom Poezen veur Albert Holtland van Gemeente Belang, vruchtenpuntn met kruusbessen veur Jan Peter van de Christen Unie en skuuties blader-deeg veur Irma van der Sloot van ‘Gruun Links. De Rotary van de Stadsbrugge beleggen metene een besleutn plenaire vergaderingk umme de uutslag van de verkiezingks nog ies in de marge arbitrair transperant deur te lichtn. Ja, a’j in de polletiek ‘et jargon niet kenn mu’j d’r bi’j wegbliemm. Metene deed zich de vroage veur: ‘Zol ‘et de ni’je wet’olders lukn in goed verband met menare saamt te warkn of wurdt ‘et toch weer breukn spalken? Zoas de VVD met invalster Marieke Spijkerman de breuke mos spalken, die de partij in ‘et veurige collezie opliep met de val van VVD-wet’older Martin Ekker.Veule tied umme ‘Spijkers’ met kopm te sloan was Marieke niet ‘egund want ni’je verkiezingks veur de gemeenteroad stonden al veur de deure. Wel probeern Marieke met bluumegies plantn in de stadswiek Brunnepe de kiezer nog met een liberaal geurspoor ‘aar kante op te stuurn, maar met drie zetels al geruume tied in de road ko’j op det punt weinig gruuj meer van de liberaaln verwachtn. De ‘Vergeet-me-nieties’die Marieke veur ‘aar ‘erkanzingk nog zei’jn kwaamm in zo kurte tied agies niet op. Op de bankies bi’j de Stadsbrugge stof genog dus veur de klaterbane. Angoande Gert Jan Veldhoen bi’jveurbeeld die op zuuk giet noa ni’je uutdagingks en deurumme gien wet’older in Kampm meer wil wezen. ‘Uutdaginks in Kampm anders genog,’ steln Jannus Flapuut vaste. Maar wat in Kampm ook veurvalt, de Rotary van de Stadsbrugge blef de rust zelve. Uut’ezunderd dan toen de name van Albert Holtland wier ‘enuumd as de ni’je wet’older van ruumtelukke ordeningk en Jannus Flapuut er ook zo uutflapm: ‘Zandzakn veur de deure!’ Niet det Holtland veur det wark ongeskikt zol wezen. Ervaringk met ruumte umme zich ‘ene te skepm meer as zat, zo’k zo denkn. Zo ‘ef iedere wet’older op ’t stad’uus zien eign kamertien. Die kump niet zomaar vri’j. Old wet’older Martin Ekker wet det as gien ander. Bestuurluk veurtiedig of’eskeutn vanuut een polletieke hinderlage deur Van Heutsz. En ofgoande op de wet van de ruumtelukke ordeningk volgt deuruut de ketting-reaksie: Ekker er uut, Holtland er in! Goed begriepm, ’t is wel de ni’je tied! Det zaa’j ook an ‘et fris opskudn van de kussens van de zetels in de gemeenteroad. Net binn of de roadsleden begunn er noa menare mee te goo’jen wat duudeluk maakn det ‘et veurneemm van B. en W. met ‘ni’je energie’ an de slag te goan, ook deur de road wier begreepm. Gait van ’t Lange Ende maakn zich veural zurgen over ‘et veurneemm van ‘et ni’je collezie de stad volgens de medarnste techniekn te goan bestuurn Deur gebruuk te maakn van drones en 3D-printers.‘Stelt oe det ies veur!’ klaagn Gait, ‘zo metene ‘et stralende getuugenis-gezichte van wet’older Meijering ook nog ies 3D ‘eprint veur oe te zien. Da’j pas rust kriegn as de printer noa 3000 veln zich ofmeldt: ‘Vandage gien 3D-Meijering! Papier is op!’ ‘t Gef wel te kenn det in Kampm altoos wat te doen is ! Det zaaj pas nog weer met ‘et skitterende slotfeest van de Kamper oamdvierdaagse! Zo’n 3200 Kampenaarn, groot en klein, jong en old, begeleid deur 780 vrijwilligers en vrijwilligsters naamm er enthousiast an deel. Pette of veur de horganisasie die ‘et wandel-spektakel elk jeur weer tut zo’n skitterend hevenement maakt. Met tut slot een overweldigend begroetingks-welkom met honderden Kampenaarn langs de route in de binnstad. Familie, vrinden en bekenden, die de deelnemers begroeten met bloemm en bargen snaaj. Sommige kienders zo zweur overladen det ze bekant op de knie’jen op de finish ofgoan. Kriegn de wandelaars enkelt snaaj en bloemm an’ebeuden? Nee! Zo sting pal veur mien een vrouwe met een flessien Beernborg in de rij de wandelaars op te wachtn.‘Veur mien skoonzeune, die lup ook mee’, lei ze niet mis te verstoan uut. Maar met de spanning op zien eugst, nam ze eerst zelf maar ies een slukkien.‘Eemm pruumm of ’t wel de goeje is,’ verontskuldigen ze zich met een ondeugnd lachien.Pette of ook veur de Kamper,- en IEsselmuuder mesiek-kurpsen, die ‘et wandel-spektakel met een vuurwark an meziek extra feesteluk opsiern. ‘Kampm, wat bi’j toch een mooie, belevenisvolle stad!’ vlug ‘et dan vol trots deur mien ‘ene. Denkend ook an Sail; de Kamper Kadefeesten; ‘et Stripboekn-festival; de Kamper Ui-t-dagen; de lampion-optuchtn; de Hanzedaagn; ‘et motorspektakel van ‘Live Life’; de ‘Eugte; de muzikale Bandjes’oams; de Kogge,-en Botterfeesten, Karst in Old Kampen,’umme maar ies wat te nuumm. Ku’j begriepm det de Rotary van de Stadsbrugge trots in zien vaandel ‘ef stoan: ‘Eens Kampm, altoos Kampm!’ ‘Det zie’j ook an ‘et ni’je Kamper treintien,’ markn Jannus Flapuut op. ‘Nog maar net in Kampen, wil ‘et now al niet met 140 noa Zwolle!’
Ajuus, Hendrik
PS: Vekansie-mijmering: Jan Pol en Johan van Heerde, vri’jwilligers van de Kamper kogge, bin in onze tuin in ‘et Keizerskwartier een vissien wezen rookn en eetn. Vrouwgies d’r bi’j. De oamd was zomers mild, de invalnde nacht struujn met heldere steerns.‘Vissies bin kleur!’riep Johan. Gul kloekn de flesse want ik skunk de Beernborrug in…
