Was Kampm al ‘et Mekka van Calvijn, now is deur de onderskeidingk: ‘Europese Reformasiestad’ bi’j’ekoomm. As bi’jdrage, dit jeur, an de nasjonale en internasjonale viering van 500 jeur Reformasie, uutgoande van de Gemeenskap van Protestantse Karkn in Europa. Kampm viern det zoaterdag met een historische optochte deur de stad, compleet met peerden en koetsen en Kampenaarn verkleed as middeleeuws voetvolk. Noa’espeuld wier det Filips van Bourgondië , as machthebber over Kampen en ‘et Oversticht Overiessel, 500 jeur geleden in de Boomkarke teems wier in’ehuldigd as bisskop van Utrecht. In de Boomkarke gaf Filips ‘et gemeentebestuur de sleutels van de stad weerumme, die ‘em teveurn deur ‘et collezie symbolisch waarn uut’ereikt.
De Kamper Historische Verenigingk Jan van Arkel gaf acht of ‘et spektakel ook geskiedkundig een bietien netties wier noa’espeuld . ‘t Was 500 jeur geleden teems de tied det de monnik Martin Luther zich teegn de Roomse karke ofzetn uut protest teegn de ofloatbrieven. Dokkumenten die de Roomse karke te koop anbeud veur ‘et witwassen van al oe zunden, maar zien Reuze-waskracht veurnamelijk teunen veur ‘et opskoonn van ‘et zwarte zoad weur ‘et Vaticaan op zat. Met ‘et protest van Luther wier de Reformasie geboorn. Kampm was deur eerder al wat mee begunn. De Gemeenskap van Karkn vun det now, 500 jeur later, wel een onderskeidingk weerd. Met Kampm er bi’j bin er now 18 Europese Reformatiesteden. Veur onze stad een mooie opsteker want as ’t weur is, wat wel ‘ezegd wurdt, det Kampm is dicht’eplakt met krantn, dan now enkelt nog met ‘et Reformatorisch Dagblad. ‘Et ni’js van de onderskeidingk wier Kampm deur de Eustenriekse bisskop Michael Bünker bericht. Now mu’j met Eustenriekers en bunkers altoos wel goed acht geemm, maar now kwaamm ze toch met een vreedzame missie.
De noa’espeulde Filips van Bourgondië en zien gevolg kwaamm met de Kamper kogge bi’j ‘et Van Heutszplein an. Skoolkienders op ‘et Van Heutszplein, die ‘eurn det een bisskop kwam anvaarn, vingen metene an te zingen. Kosten ze wel muujte want nog nooit was Sundekloas zó vrog en met zo’n vreemd skip an’ekoomm. ‘Ik bin de bisskop van Utrecht, niet van Spanje,’ lei Filips de kienders uut toen ie an wal stapm wat een keerltien van zesse zó teleursteln det ie Filips teegn de skeenn skupm wat de bisskop een woord ontlokn det ‘em metene rieppe maakn veur de ‘ofloat.’ Vanuut IEsselmuudn begaf de stoet zich noa de Boomkarke, weur Filips de borgemeester de sleutels van de stad weerumme gaf. ‘Met een stemme as van een stadsummeroeper ’et collezie waarskouwend: ‘Zurg goed veur de stad!’ ’Det doen wi’j altoos al!’ mokn B en W, die Filips ( medarn ‘espeld: Philips) met die opmarking gien licht vunden.
De ‘oge gast roemm metene ‘et voortskrijdend inzicht van ‘et collezie in muujlukke bestuurlukke zaakn. Zoas een parkeerdek bouwen weur vrogger een gasfebriek ‘ef ‘estoan, maar dan tut ‘et voortskrijdend inzicht kump op die plekke beter de netuur zien gang te loatn goan zodet een geurend grusveld ontstiet det as grootste honden-twelet van Europa teems veur een underskeidingk in anmarking kump. Ook roemm Filips ‘et voortskrijdend inzicht van de dillegasie van B en W, die in de Hongaarse vriendskaps-plaase ‘Papa’ met woorden as: ‘Super aangenaam verrast,’ zich lovend uutliet over de zurg, weurmee ze in Papa bizundere gebouwen restaureern. Weerumme in Kampm is de dillegasie ook nog eemm goan kiekn bi’j ‘et op insturtn stoande bizundere pand an de Boommhaven. Deur is toen niet ‘espreukn, enkelt ‘elipt. De borgemeester ging met cake rond…
Dark Toestebolte vernam bi’j de Rotary van de Stadsbrugge det ‘et verkriegn van de onderskeidingk veur Kampm karkeluk was in’eluid deur de zangpedagoge Luthine Postuma-Groen en de domineers Jan Bouma en Gerrit de Fijter. Wel dut de ni’je vurm ‘Reformasiestad’ ( zoveule op een olderwetse karkskeuringk liekend) ‘et richtingksgevuul van de kark-uiln in Kampen weer op tilt sloan. Pette of veur onze borgemeester die skitterend verkleed in de stoet meeliep. Enkelt old wet’older Martin Ekker, bange veur peutien lichten, op een loopfietse. Gait Jan Veldhoen zien middeleeuws wambuis zat ‘em zo stragge det ie ‘eel de weg noa de Boomkarke as een vis op ‘et dreuge noa lucht happen. Wet’older Meijering kreeg det in de gaatn en waarskouwen de borgemeester, noast ‘em in de stoet: ’Ik gleuve det Veldhoen oe rup.’ Martin Ekker, deskundig met op de bleurn zitn, wier onderweg nog op’ereupm in de bessemwaagn een gemene plekke bi’j Albert Holtland van Gemeentebelang te koomm deurprikn. ‘Et saamt ummekleden wier deur B en W eerst nog op ’t stad’uus ‘erippeteerd. Veural ‘et lange tied sanitair stragge met de knie’jen teegn menare zitn. Want ie weetn, 500 jeur geleden kenn ze nog gien gulpen in broekn en zo’n plechtig’eid in de Boomkarke kan, zekers veur oldere heern, een lange zit wezen…
Enkelt Gait Jan Veldhoen kleden zich umme in ene van de ‘ukkies van de olde palingrokerij’je in Brunnepe. Een mooie kans die persoonluk ies uut te probeern. Roel Vahl van de Stichting Visrokerij vertul ‘em det met een bietien goeje wille de rook‘ukkies op de bestoande plekke nog goed te gebruukn bin. Maar ’t ummekleden in zo’n benauwde ruumte viel Veldhoen toch teegn. Een uur lang sting ie te martelen en toen ‘em de broek ook nog uut de ‘ulpzeeln skeut en Gait Jan deur de knie’jen mos umme die weer op te trekn kwam ie in die benauwde ruumte zó klemvaste te zitn det Vahl ‘em er met een paling-spittien mos uutkrabm. ‘Ik roekke vis,’ riep borgemeester Koelewijn dan ook toen Veldhoen, verkleed als Balju, weer veur ‘em sting. ‘Roek ie ook ies Vahln!’ steln de borgemeester veur. Maar Vahl met Veldhoen in de buurte reuk enkelt onroad… Affijn, Kampm stoomm weer ies op in de veurt der volkeren. As Steurnstad, maar now ook as Europese Reformasiestad! Weurvan akte!
Ajuus, Hendrik
