Kamper Kruudmoes

Stikt de buule!

Kampens borgemeester Bort Koelewijn kump uut Bunschoten-Spakenborrug. Da’ s dubbel’op en deurumme bizunder. Spakenborrug kreeg dan ook wat bizunders uut Kampm weerumme: een lichtgewicht skot det hautomatiek met de waterstanden mee op en neer giet en zo as ofdoende waterkeringk warkt. Een slimme uutvindink van Kampenaar Johan van den Noort, weur Spakenborrug zien veurdeel mee dut. Kampm wol niet. Bange det Van den Noort met zien beweegbare ‘diek’ de stad een ni’je Kamper Ui zol bezurgen.

Kampm keus veur de vertrouwde, maar vuule ingewikkelder en vuule duurdere oplussink van iezeren keerklepm, verzunkn in ‘et wegdek. Een speciaal getrainde brigade van 200 vri’jwilligers drei’jt die klepm rap in de ‘eugte as ‘et water kump opzetn. Tegeliekke met ‘et plaasen van 220 waterkerende skotn an de veurdeure van ‘uuzen an de IEsselkante, die dan nog deur ‘et water bedreigd wurn. Mu’j wel zo rap wezen as water…De vroage is, ‘ef zo’n zweure waterkerink nog wel neudig, now bi’j Kampm veur miljoenen kostende een bypass wurdt en’elegd, die et teveul an IEsselwater liniaal rectum noa de randmeern ofvoert?

Spakenborg zekers en keus deurumme veur ‘et beste uut Kampm. ‘Now Bort nog weerumme!’ ‘eur ie ze deur al roepm. ‘Ook nooit ene keer!’ wun Jannus Flapuut zich op. Bort is al zo lange borgemeester van de stad, Kampm ‘em in de genen.’ Jannus ‘ef geliek! Det zaa’j underlest nog weer toen een kladde journalisten uut binn-‘ en buutnland de stad bezuchtn. Bort roemm Kampm of ie er is geboorn . Deurbi’j beud ie de verslaggevers een kookbeukien met recepten uut ‘eel vrogger tiedn an. ‘Kunn ze ook thuus nog ies de smaak van Kampm pruumm,’ bedacht Bort. De journalisten waarn ‘ier op uutneudigink van de Kamper organisasie: ‘Hanzesteden Marketing’. Die verzurgen promosie reizen veur de pars noa Hanzesteden in Overiessel en Gelderland. In Kampm vieln de journalisten al rap van d’r gleuf of det Kampm over meer karken as ‘uuzen zol besikn en de Kampenaarn nogal bezweurd deur ‘et leemm zol’n goan. Preuties! Wat de journalistn warkeluk antruffen is een medarne, gastvri’je stad, vol ofwisselingk en vetier, met een bloeiend verenigingksleemm, een kladde meziekurpsen en jubelende zangkoorn. Een stad ook met een klassiek theater, boeiende musea, een skat an winkels en winkelties en gezellige horecabedrijven met sfeervolle terrassies. Det alles ummeliest met historische poorten, monnumentale gotische karkn en een altoos ‘wees welkom’ murmelende IESsel.

‘Ei’j nog de Kamper Ui’jen, symbool van volwassen zelfspot van de Kampenaarn. Det zaaj ook nog met die journalisten op bezuuk. ‘Et programma vermelden een boottuchien op IEssel umme de journalisten vanof ‘et water ‘et zeldzaam mooie stadsfront van Kampm te loaten zien. ‘Et beutien lag al kleur, maar ie zuln ’t net zien: wol niet vaarn. Wel vaarn, maar enkelt achteruut! De organisasie kwam er rond veur uut: ‘Mensen, ho eemm. ‘Det beutien giet enkelt maar achteruut!’ Now bin verslaggevers best wat ‘ewend, maar beuties die veuruut enkelt achteruut goan… Van verbazingk viel de journa;isten now dan toch de bek lus. De reisleidster lmelden voorts det de skipper van ‘et beutien eerst nog eemm noa ‘et motortien wol kiekn. De krantemensen teunn niet enkelt begrip, er wier ook mee’edacht noa een oplussingk ‘A’j det beutien now ies ummekeern,’ steln Frans Raven van ‘De Telegraaf’ veur. ‘Dan vaart ie wel achteruut, maar goa’j toch veuruut!’ Een deurdenkertien det reuk noa een primeurtien. De journalisten woln de penne al pakn toen de bootsman melden det ie de fout ‘ad ‘evunden. ’t Is de keerkoppeling,’ steln ie vaste.

Ene uut Zwolle met Zwolse ballegies as kogellagers en dan krie’j det.’ Reperasie wol niet lukn en dus ging ‘et bizundere tuchien op de IEssel niet deur. Een teegnvaller, die de journalisten op Koggewarf stevig ofblusten met een koggebittertien. Maar ook deur sting ze nog een teleurstellink te wachtn. De kogge weur ze noa uutkeekn was er niet. ‘Kampens parade-peerdtien van de Hanze lag veur een grote onder’oldsbeurte op de warf in Urk. ‘En det dan? wees de reporter van ‘et blad ‘Vijftig Plus’ noa een skaalmodel van een kogge. ’Enkelt maar een veurbeeldtien, ’ lei Reijer van ’t Hul uut, die as ene van de meest veuranstoande vrijwilligers van de Stichting Kamper Kogge, maar meer nog as old onderwiezer (met al vrog anleg veur boomm-meester), saamt met vrijwilligster Ina Hup, de rondleidingk op de warf op zich ‘ad nam. Met zien uutgebreide Akte Plus veur vreemde taaln lei Reijer in vluujend Kampers-Engels-Duits-Nederlands uut : ‘Was sie ‘ier seen is een skaalmedel from the kogge. The real kogge leg in Oerk. Wi’j zègn: Urk. ’ ‘Also, fahren wir noa Oerk !’ steln een Duitse journalist veur, maar det lukn met ‘et pregramma niet. De man, in de geskiedenis van zien land toch al niet succesvol beloond met: ‘Und wir farhren’, raakn er deur in de warre. Deurumme nam ie nog maar een Koggebittertien. Pruumm ie toch nog wat van de weure smaak van de Hanze. ‘Maar wa’k ‘ier ook skrieve, pette of veur Hester Timmerman van ‘Hanzesteden Marketing’, die de parsreizen noa de Hanzesteden knappies verzurgen. Met in Kampm een uutgebreide bezichtigink van de stad. Een bezuuk an de Boomkarke, de smederij’je in de Veurstroate, ‘et proeflekaal-resterant De Stomme van Campen, sigaarnfebriek De Olifant en Chocolaterie De Swaen an de Oldestroate. ‘Et bezuuk wier of’erond met een mooie lunch in de Koornmarktspoorte. Stoande want de poorte kent gien stuulties. De al wat olderen zaa’j dan ook met knikkende knie’jen wat murserug an de soep. De journalisten zei’jen noa ofloop te ‘em geneutn van de bizundere skoonheid van Kampm. Weer thuus op de krante wachtte toen enkelt nog de penne!

‘Allo, Hendrik

PS: Borgemeester Bort Koelewijn is veurstander van een avondklokke veur asielzuukers. Want ene van die gasten verkrachtn een zeumtien jeurig meisien uut Kampm. De SP is veurnemens de borgemeester in de road over die klokke ies zweur an de tand te vuuln. ‘Deurbietn, borgemeester!’ klinkt ‘et bemoedigend noa Bort deur de vrouwen bi’j ‘et station in Keuln…