Stikt de buule!
As er Kampenaarn figuurluk, maar zeker ook letterluk in de putte zitn dan wel de ummewonenden van de bouwputte an de Noordweg. De plekke in Kampm, weur vrogger de gasfebriek ‘ef ‘estoan, maar weur now de ni’je parkeergarage mut koomm. Want ie zuln deur maar woonn! Giftige dampm uut de grond en woninks die skeurn deur ‘et heien veur de bouw van‘et ni’je parkeerdek. Vreemde luchies die de bewoners en de heiers teems geveurluk ziek maakn. Maar ie zien ook zwarmen vreemde vliegies, die bi’j ‘et heien teveurskien kwaamm en in de ‘uuzen lekker warm de vleugelties uutsloan. Nog eemm en an de Noordweg en Oranjesingel sloapm ze onder de klamboe... De gemeente, as opdrachtgever van de garagebouw, teunt zich deur al die teegnslaagn overvaln.
Reden det ze de oorzake van al die ellende ies diepgoand wil goan onderzuukn. ‘Ad det maar eerder ‘edoan’, roepm de bewoners van de verzakkende ‘uuzen, die ook van een plaaselukke over’eid magn verwachtn ‘det regeern is veuruutzien!’ ‘Oe kon ‘t zo misgoan? Misskien deur de veurt, weurmee de gemeente de ni’je parkeerplaase kleur wol stoomm, eer de Internasjonale Hanzedaagn binnkurt in Kampm beginn. Een spectakel weur, noa verwachting, vele tienduuzenden bezuukers, overal vandoande, noa toe zuln koomm. Kampen wil, als gastvri’je, feestende Hanzestad, al die bezuukers graag een bietien nette parkeerplaase anbieden. Det ‘et ni’je parkeerdek now nog op tied kleur kump, ku’j wel vergeetn. Ook al deurdet de arbeidsinspectie ‘et wark an de bouwputte offisjeel stil ‘ef ‘elegd. Wel ‘ef de gemeente now alle tied de gedupeerde bewoners netties te informeern wat ‘er met de bouw allemoale mis is ‘egaon en wat er nog te liemm valt. Veur ‘et al ‘esloopte bizundere sluusien det bi’j ‘et graam bi’j verrassink teveurskien kwam is ‘et veur liemm te late! An gurt ‘eslaagn in de zucht noa veuruutgang. Gelukkig ‘ef Kampm nog wel de foto’s van det zeldzaam waterloopkundig monnument...
‘Ook as gemeente leern wi’j ‘iervan,’ sprak wet’older Geert Meijering leergierug. Deurumme zekers det de gemeente de gedupeerde buurtbewoners veur tekst en uutleg uutneudigen in zaal ‘Meet-Point’ an de Veerweg. ’t Wier een overleg in de dampkringe van de bouwputte, zoda’j ‘et onderwerp van gesprek metene ook van dichtebi’j konden roekn. Veur een barstens volle zaal truk de gemeente veurzichtug ‘et boetekleed an. De bewoners teunen zich op de vergaderink ruumskoots bewapend met grieven die ze achter menare op de gemeente ofvuurm. De gemeente van zien kante deed zien best det vuurwark of te weern, wat maar deels lukn. Want zat ‘et de gemeente bi’j ‘et heien van de poaln al teegn, spiekers met kopm sloan lukn de gemeente now ook niet. Ondanks de zweure verdedigings-linie, bestoande uut Kampens borgemeester, de verantwoordelukke wet’older, een uutvoerder, de annemer, onderzuukers, opzichters en zoweur ook nog een afgezant van de geneeskundige dienst...
Die steunpilaar van de gemeente wier deur de zaal met zoveule muujlukke vroagn over ‘et geveur van kwoalukke dampm uut de bouwputte in ‘et nauw ‘edreemm, det ie van de zenuws, stoande de vergadering, bekant zelf al an ‘et infuus mos. Ook de techniek sting die oamd an de kante van de gemeente want metene al, veur in de oamd, wier de spanning ene van de microfoons te veule en viel uut, zodet de klachten van de bewoners eerst niet geheid deurkwaamm. As compensasie veur alle ongemak trakteern de gemeente de anwezigen op een gratis kuppien koffie. Een mooi gebaar ook al gaf det de gedupeerden ‘et gevuul deur de gemeente dubbel op de koffie te koomm... Conclusie van ‘et gezag: ‘Goat maar rustig slaopm, in ofwachting van de uutslag van nog een kladde onderzuukn. Det luchten niet echt op want van de zenuws en argenis over die stinkende bouwputte ‘em de buurtbewoners al uutslag genog...
Maar teegnslag kump nooit allenig. Zo dreign de leden van de ‘Pachtersbond Kampereiland’ now weer in opstand te koomm teegn de gemeente, die volgens de Kampereilander veeboern te vake te veule pacht van de bedrijven zol vroagn. Steeg de pacht in 2015 met 13 percent, noa verluidt kump deur zo metene nog ies 22 percent bi’j! Veur de 100 pachters van ‘et Kampereiland is deurmee de moate vol. Uut’emulken as de pachters zich vuuln, dreigen ze met gier op de stoeppe van ’t stad’uus ‘et collesjie te loatn zien, ‘eurn en roekn oe pissig ofdet de boern op de gemeente wel bin. Goed begriepm, de melkvee’olders ‘em ‘et al muujluk zat met ‘oge bedrijfskosten en skrikbarend magere melkpriezen. Eerder al dreigen de Kampereilander veeboern met volle giertanks de gemeente te overvaln uut onvrede met wat ze nuumm: ‘Pachtpriezen met reket-andrieving!’ ‘t Bleef tut dusvarre bi’j dreigen, maar een kladde pachters ‘ad de spandoekn al kleur met briesende leuzen as: ‘Drei’j de Boer gien Loer!’ en: ‘De boer tut op zien reet, deur ‘oge pachten uut’ekleed..!’
Wel wier det leste doek op andrang van og een klikkien handmatig melkende boern as wat te arg angriepend van toafel ‘eveegd, maar zo te vinden in een skuure op ‘slaagn, veur geval det ‘et nog neudig zol wezen. Op een speciaal bilateraal besleutn, maar veur de transparansie hopenbare vergaderink van de Rotary van de Stadsbrugge lei Dark Toestebolte de gang van zaakn met de pachtpriezen uut. ‘Kiek’, zeeg ie, ‘de gemeente is veur 100 percent eigenaar van de andeeln van de Kampereiland b.v. en deurmee de b.v. ook zelf. De road van comissarissen deurvan adviseert de gemeente over de pachtpriezen. Die mag zo ‘oge wezen as de ruumte in ‘et ‘Pachtnormenbesluut’ det toelut. Deur die veursteln ook zo op te volgen giet de gemeente zien buukien offisjeel niet te buutn. De vroage is: ‘Mutn die ‘eugste bedraagn wel zo neudig, a’j weetn det ‘et gemeentebestuur al det veule geld as appeltien veur de durst bewaart in ‘et puttien van de Algemene Resarve... Mag de gemeente hoopm det ze det puttien, in de skaduw van de giertanks, wel dreuge kunn ‘oln,’ zo waarskouwen Dark.
Allo, Hendrik
