Stikt de buule!
’t Waarn weer drukke daagn in Kampm. Met een heksposisie in de Stadskazarne over de geskiedenis van Kampm as garnizoen, de netuurverenigink Iesseldelta viern zien veertigjeurig bestoan, Jack Ruiten en Robbie van der Weerd horganiseern een skitterende muzikale vaartocht op de Iessel met de salonboot ‘De Veerman van Kampm’ en op ‘et Van Heutszplein horganiseern ‘et Nederlands Agrarisch Jongerencontact ‘et landeluk kampioenskap koe’jen beoordeeln. Jonge agrariërs moszen loatn zien det ze een skarp oge ‘em veur vrouweluk skoon. Maar dan wel ‘et vrouweluk skoon van de Janna’s Twaalf en Bartha’s Zestienne van de veestapel. Melkvee keurn is nog merakels muujluk. Al metene bi’j de eerste ronde op ‘t Van Heutszplein ging Janna Acht er vandeur toen bi’j de keuringk de olde mesiektopper: ‘Noa de bollen’ klunk en Janna menen ‘ierin de lokroep van ‘aar lievelingsstier: ‘De bolle uut Zwolle’ te verstoan. Borgemeester Bort Koelewijn kwam de keurink offisjeel hopenen. Met een mooie toesprake. Ook weer niet tekurt zodet de koe’jn er bi’j gingen lègn. Bort lei uut det Kampm met zien Kampereiland een agrarische gemeente is. Met bi’j menare 300 Kampereilander koeien en 5000 hectare Kampereilander grus. ‘Een veeteeltgebied umme trots op te wezen,’ roemen de borgemeester. ‘Zoveule grus ?!’verbazen Jannus Flapuut zich. ‘Oe kriegn die beesten det allemoale weg en nog herkauwen ook! De koe’jen op ‘et Van Heutsz stonden er stuk veur stuk prontig op’epoetst bi’j. ‘Ie goan toch zekers niet noa zo’n hitsige Tiroler seksfilm?!’ wol Geesien van Gait van ’t Lange Ende weetn, toen ze op de uutneudigink in koeien van letters las: ‘Glanzende spenen en strakke Uiers’. ‘Oe ‘iet die koe deur?’ wees Drieka van Dark Toestebolte, noa een koe met een uier, meutien wereldcup. ‘Dolly Parten,’antwoorden de vee’older zonder noa te ‘oeven denkn. Ook ‘ef een veekeurink zien eign taalgebruuk. Opmarkinks as: ‘Goed algemeen veurkoomm, mooie robuust’eid in de uier en skitterend beenwark,’ skaln dan ook over ‘et Van Heutszplein. Een prontige Kamperse, die net passeern, raakn er deur van streek. ‘Kiek noa oezelf oversekste loerdert!’ skul ze noa de keurmeester, die andachtig een koe bevuuln, maar toevallig eemm ‘aar kante opkeek. Maar ook de koeien ‘adn ‘et op ‘et Van Heutszplein niet makkeluk. Deur te mutn stoan met uutzicht op de zukadelapm in de etalasie van slager Norg. A’j proatn van veur-geslacht...
De Kamper spurtskole ‘Leef’ van Bert en Ineke Woning an de Reigerweg op ‘et Industrieterrein beskikt sinds kurt over een bizundere, in oosterse stijl op’ezette ontspanningstuin. Een knap stukkien vakwark van Bert zelf. Want noast expert in de gezond‘eidsleer is ie ook merakels ‘andig met de timmerkiste. Ene keer maar sloeg ie mis. ‘Ei’j d’r weer een tatoe bi’j? informeern zien klanten, wiezend noa Berts doemme, die dieppe blauw teunen. Maar wat zol ‘t? In de oosterse relaxtuin ku’j tut oezelf koomm in een goed liekend Chinees thee’uusien bi’j een kabbelend watervallegien of ontspann oe geest verruumm op een sfeervol mozaïkterras bi’j een vijver met wuivende Kooikarpers. De feestelukke hopening van Berts uutzunderlukke tuin viel saamt met ‘et 15-jeurig bestoan van zien uutgebreide spurt- en meditasie-skole. Met fitness, krachtspurt, yoga, spinning, Qui Gong en Rai Chi een weur tankstation veur ni’je leems-energie. Jannus Flapuut was bi’j de hopening. ‘Mien Frederika is goed in hasjee,’ bekenn ie Ineke. ‘Ook in clubverband?’wol Bert weetn. ‘Nee,’antwoorden Jannus’ ‘gewoon met een krummelig eerrappeltien en een kladde vleis!’ Bert glimlachen maar ies. Oosters wies as ie is!
Thuus veur de buis geneutn van onze koning en koningginne op de trone in de Ridderzaal. De Troonrede klunk as een spreukien want de boodskap luiden: ‘De crisis is veurbi’j!’ ‘Zo’j anders niet zègn a’j Willem Alexander en Maxima in een tweedehands glazen koetse noa de Ridderzaal zaagn rieden,’ sprak Gait ‘van ’t Lange Ende. De dames in de Ridderzaal waarn weer uutdagend uut’edost met taarten van ‘uuties op de kop. Ie zuln er maar achter zitn. ‘Wi’j zo vrindeluk wezen die witte iesmusse van oe eemm van de kop te doen? Ie beneemm mien ‘et zicht op de trone,’ stootn een minister in de Ridderzaal, de veur ‘em zittende dame an. Toen die ummekeek bleek ‘et Wilders wezen. Met achterover ‘ekampt ‘eur en min of meer skeidink..‘Sorry!’verontskuldigen de minister zich...
Op uutneudigink van de muzikale Kamper ‘Tigerclub’ mee uut vaarn ‘ewest met ‘De Veerman van Kampm’. ‘t Kan now nog want eigenaar Gerrit van der Veer en zien vrouwe Ingela Abbing verzurgen al tien jeur rondvaarten met ‘De Veerman’ en geeft maar ies acht: altoos noa tien jeur bin ze an een ni’je uutdagink toe... ‘De Veerman’ maakn now een vaartocht op de IEssel met lief’ebbers van mesiek uut de zestiger en zeumtiger jeurn. Zestien jeur geleden ‘ef Jac Ruiten de Kamper Tiger Club op’ericht; later met Robby van der Weerd er bi’j in de horganisasie. Succes verzekerd. Disse keer met daverende bands an boord as: ‘The time Travellers’ ‘Soul Mates’ en niet te vergeetn: ‘Full Circle’. Paniek brak nog uut toen Robby van der Weerd ‘et optreden van de band ‘Clemens en Clemens’ ankundigen wat bi’j alle drukte wier verstaon det ook Kampens old-borgemeester Henk Kleemans met zien golvende kuif ook nog twee optredens zol verzurgen. Wel onder zien bi’jname: ‘Henkie Watergolf’. Maar ‘Watergolf’ roepm op een varend skip gef te denken, zodet in een mum van tied de grootste drukte zich verplaasen noa ‘et reddinksbeutien op ‘et prommenadedek. Ook ko’j as pebliek verzuuknummers anvroagn. ‘Ol ie oe now maar stille,’ gebeud Robbie van der Weerd mien toen ‘k een stap noa veurn deed umme de ‘Posthoorngallop’ van de ‘Bietnbouwers’ an te vroagn. Gien ‘Posthoorngallop’ dus. D’r was varders ook gien vroage noa. Alle Tigers an boord geneutn zichtbaar. Er wier zelfs een dansien ‘emaakt. Enkel een vestoord vissien kwam vinnig boomm water kieken. Maar vroag ie ‘et mien: pette of veur Jac Ruiten en Robbie van der Weerd. ’t Was weer ‘Soul Mates’ bezield onder menare op de IEssel.
‘Allo, Hendrik.
