Kamper Kruudmoes

(door Henk de Koning)
Borgemeester Bort Koelewien is herbenuumd tut borgemeester van Kampm. Veur opni'j 6 jeur. De benuuming was al wel lange bekend, maar de installasie mos nog gebeurn. De road kwam er speciaal veur bi'j menare e'koomm en zung de borgemeester vn ‘arte toe toe: ‘Old er de moed maar in!' Alle fraksies waarn veur de herbenuumink. Enkelt uut de SGP- microfoon steeg een stofwolke op toen ze met ‘et veurstel mee insteunn. ‘Zekers de positieve bedroadingk in de verstarker lange tied niet gebruukt bi'j ‘et stemm over festiviteiten  in de stad,' verondersteln Jannus Flapuut.

De borgemeester, bli'j met zien herbenuumink, trakteern op taarties in de road. Goed bedoeld, maar vergat er in de taartieswinkel bi'j te zègn: ‘Gien moorkopm!' Now ‘ad de bakker nog deuzen vol stoan uut de tied van Zwartn-Pietn-crisis weur ie maar wat graag vanof wol. De borgemeester wier ‘et bukkien. ‘Ook niet slimme van Bort a'j weetn det moorkopm, saamt met Negerzoenn, met stip op de zwarte lieste van ‘et verbeuden diskrimmenasie-snaaj stoan,' markn Bartus Pekel'erink op.

Bort ‘oopm det de road niet zol marken det ie op moorkopm trakteern en de negroïde taarties ‘slaafs' zol anpakn. Maar dan ken ie de Kamper gemeenteroad nog niet. Altoos kuppien lus. Kiek noa de 43 meter ‘oge woontoorn van beton en glas die  vanof ‘et Barkterrein ons wondermooie stadsfront ‘opleukt.' Nog viere van die bouwkundige misbaksels stoan bi'j de projectontwikkelaar in de wacht. Stelt oe veur det ons gemeentebestuur deur een stukkien veur stek,,,

't Zat de gemeente de leste tied ook niet mee. Eerst dure grond an‘ekucht veur de bouw van 1300 luxe woninks langs ‘et water van de bypass det deur de crisis gien deurgang kan vinden met now weer een borgemeester die een kladde uutgerangeerde moorkopm in zien mage ‘esplitst kreg. Overjeurig ook nog want lange tied terug al deur de haksiegroep ‘Zwarte Piet' in de ban ‘edoan. ‘Ik neme er wel een paar mee veur thuus,' sprak Albert Holtland van Gemeentebelang, die niet wol det de borgemeester bi'j zien herbenuumink metene al de s(moor) in zol kriegn. ‘Die eh....eetn wi'j thuus dan wel op met ‘et licht uut!' Zie'j ook niet det ‘et eh..... bin,' sprak Albert, van de geleegn'eid gebruuk makend ‘et volk te teunn det Gemeentebelang best wel wat dorft an te pakn, zonder metene ook kleure taal te spreekn. Want det gezeurzok barst zo metene weer lus: wel of gien Zwarte Piet! De veurstanders van een witte of een gekleurde knechte van Sundekloas stoan al in de startblokn. Uut veurzurg nemp Sundekloas dit jeur wel zwarte knechtn mee, maar verborgen onder zien tabberd. ‘Mien maniere van mantelzurg,' melden de Sint vanuut Madrid met pienne in zien mars, ook wel: marsepienne.

Ook Kampm wil graag zien bi'jdrage leveren an de nood-upvang van vluchtelingen uut de oorlogsgebieden.

Vier stadgenootn, an'evoerd deur Huibert van Noort, roepm op veur ruumte te zurgen. De karkn stroomm leeg dus plekke zat in Kampm, zo'j zo denkn. Maar road ies wat? Vluchtelingen bi'j de vleet, maar Kampm kriegn ze niet. ‘Er bin gemeentes met betere accomodasies,' zo  ‘ef ‘et Centraal Orgaan opvang Asielzoekers B en W offisjeel loatn weetn. Misskien det Huubert zien oproep anders ‘ad mutn steln. ‘Saamt een voeste maakn,' zo sting in now in zien oproep te lezen. Beter was ‘ewest: ‘Helpende hand.' De voeste kenn die vluchtelingen wel...!

De Stichting Philadelphia ziet of  van zien veurneemm ‘et vervaln pand an de Boomhaamstroate te restaureern en in gebruuk te neemm. ‘t Wurdt veur Philadelphia een te dure ondernemink. De villa en de grond bin eigndom van projekt-ontwikkelaar Mateboer uut Kampm. De previncie ‘ef er 200.000 euro veur over a'j ‘et beeldbepalend pand weer in olde stijl opknapm. Mateboer wil ‘et redden deur ni'jbouw. Det (olde) plan kump Mateboer op 350.000 euro. Wet'older Veldhoen maakn duudeluk det ‘et met die vervaln villa now eindeluk ies goed mut koomm. 't Viel Geesien van 't Achterummegien metene op: ‘Een Veldhoen die er as de kipm bi'j is en niet kakelt!'

Pette of veur de Oranjeverenigink van ‘et Kampereiland. Die viern ‘aar 70-jeurig bestoan met een skitterende toneel-opvoerink in de hopen lucht bi'j de museumboerderij'je op ‘et Kampereiland. Op'evoerd wier een geskiedkundig stuk over de strijd van de Kampereilanders teegn de sturmvloed van de Zuuderzee in vrogger tieden. ‘Eel wat boerderijen kwaamm toen onder water te stoan. Vandeur ook de name van ‘et spel: ‘Water...'  Albert Bast die de regie voern skreef ook de tekst. De spanning dreup er vanof.

Det veule water kree'j ook te zien; zo echt mogelijk in beeld ‘ebracht deur gebruuk te maakn van lasertechniek. De koeien sprungen van skrik met beierende uiers as alarmklokn deur de wei. Drieka van Dark Toestebolte zat met op'etrukn knie'jen, bange veur natte voetn. ‘Wegwezen, wi'j goan verzoepm!' galpm Jenne van 't Veerkuppien met een piepstemmegien van angst toen ze de bewoners van een onder laser-water stoande boerderij'je ‘et dak op zag vluchtn. De sturm loeien boomm ‘et bange vee uut. ‘Oe zol ‘t ofloopm met de bewoners van de terpboerderij'je? Zuln ze disse vloed wel overleemm of zuln ze letterluk en figuurluk kuppien ondergoan?' zo kwam uut ‘et spel noa veurn. ‘Ik goa noa ‘uus! De spanning wurdt mien te veule!' riep ze met de knie'jen over menare. Thuus noa ‘et twelet en toen de tv maar ies an. ‘De aarde warmt op. De zeespiegel stijgt,' waarskouwen de omroeper met al net zo'n rampstemme. Jenne truk de jasse maar weer an en keern weerumme noa de oranjeverenigink op ‘et Kampereiland. ‘Water...' weur a'j ook bin...!' riep ze in de kesumpsie-tente. ‘Dut mien maar een wientien!' Ze drunk ‘et in alle rust. ‘t Was net eb in de pauze...

‘Allo, Hendrik

PS: Kampm bezuunigt... Gien bluumegies meer in de borders van ons mooie plantsoen. Zelfs gien vioolties meer. 't Blef deurumme nog wel een mooi plantsoen, maar de mesiek is er uut!