Column: t´is maar wat in disse stad

"Vakansie zit d'r op de road giet weer an de slag en kreg de komende winter ‘eel wat veur de koezn, denk allenig maar an 't zorg dosjee det mut allemoale veur volgend joar e regelt weezn, alles van 't rijk noar de gemeente, ze kunn de borst nat maakn. Ze em de zaak verdeeld over drie wet'olders, en of det warkt zal nog mutten bliekn. D'r was wel ies kritiek op old wet'older Lidy Kievit maar dit dosjee kenn ze van binn en van buutn, det was bi'j ‘aar in goeie ‘andn. De zorg wordt nog een grote zorg, want die zogenaamde participasie maatschappij is niks anders dan een ordinaire bezuneging van de over'eid.

Over 't algemeen is mien glas ‘alf vol, maar soms denk ik wel ies nog één slukkien en ei'j is leeg. Ik dan bedoel ik ‘ier wet'older Gaitjan Velthoen, toen ie antrad dacht ik det is d'r ene die van wantn wet. Noa een joarn lange discussie over de Boom áamtstroate 14 viel de beslissing det 't pand in de beenn mos bliemm maar doar bleef 't bi'j. En toen kwam Velthoen, en die zeeg veur de vakansie van twee duzend twaalf is d'r een plan en wordt de villa an e pakt. Maar ook disse wet'older is deur 't ies e zakt, ‘t is now noa de vakansie twee duzend veertiene en de villa stiet d'r nog steeds verleurn bi'j. Skandalig oe de gemeente met zien bezit umme giet. Nog zo'n veurbeeld van veule beloovn en weing geemm, de portiers woning van Bark an de Noordweg, loak d'r maar over op'oaln want ie kunn oe wel overal druk umme maakn, maar doar kreg een mense ‘t van an ‘t ‘arte.

Woar mien glas wel ‘alf vol van is is de ni'je koers van radio IJsselmond, ik éb bewondering veur Bert Weever die as old politicus 't veurzitters skap op zich ef e neumm, want d'r bin al ‘eel wat old politici over e strukelt, um maar ies een paar old veurzitters te nuumm, Harry de Goede, Arie Hup, Henk Keppel, en Alois Vierstraete. Bovendien an Albert van Dam em ze een ni'je penningmeester die ik mien pottemenee dorve mee te geemm. 't Kump elemoale goed met radio IJsselmond.

't Liekt d'r op det de kogel deur de karke is, de road giet d'r in meerder'eid mee akkoord det met biezundere evenementen de winkels op zundag los bin,maar of det in de praktijk ook een sukses wordt, ik betwiefel ‘t, ik kan niet veur de ‘ele middenstand proatn maar ik kenne d'r een paar die zeggn, veur mien was 't eens maar nooit weer, kladde mensen in de winkel extra personeels lasten en niks verkoopn, d'r mos geld bi'j. En doar blef 't wat de road betreft ook bi'j want Kampen is niet riepe veur de koopzundag, en loat det asteblief mooi zo bliemm. As ze wat willn loat ze de koop oamd maar ofskaffen en op zoaterdag wat langer los bliemm, want rond een uur of vijf lop d'r nog een bult volk op de Oldestroate.

D'r kump weer een cursus Kamper taal, onder de hoede van de historische vereniging Jan van Arkel, en Johan Prins uut Wilsum is de trekker, ik kan 't jullie van ‘arte anbeveeln.
Óld 't goed in de gaatn, en blief bi'j de les want d'r is altied wel wat in disse stad."

Appien Floep