Column: Kamper Kruudmoes

Stik de buule!

(door Henk de Koning)
Kampens veurige borgemeester Sybren van Tuinen nuumm Kampm: ‘ Een Stad, een Durp en een Eiland tegeliekke.' Maar Kampen was veurige moand ook City. Met ‘et op de Plantage saamkoomm van 200 Kampenaarn uut protest teegn de bloedige terreuranslaagn in Parijs. Gepleegd deur barbaarn, zich verskansend achter de Islam. ‘Et verdriet, wereldwied, umme de onskuldige slachtoffers truf ook dieppe de anwezigen op de Plantage. Hand in hand, saamt stark stoand teegn bruut geweld sprak borgemeester Bort Koelewijn: ‘De vrijheid van meningsuuting is een groot goed. Daar zijn we trots op, dat moeten we koesteren.' Troostrieke woorden van een weure borgervader!

‘Et goeje doel is ons Nederlanders ‘eilig en deur bin best krasse veurbeelden van. Daagnlang poalzitn in een weiland veur de bouw van een waterputte in een Afrikaans dreugte-durpien bi'j veurbeeld of met de ankoop van een pak luiers bi'jdraagn in de kosten veur moandverband in de Congo. Want veur ‘et goeje doel giet ons gien zee te ‘oge. Zo ‘em Kampenaarn ook al ies ‘olten pleegies ‘ebouwd veur Amerikaanse Indianen in een achter'ebleemm reservaat. Toen de pleegies er stonden en de ‘weldoeners' weer waarn vertrukn, vroggen de Indianen zich wel of weur ze met de volle tonn uut de pleegies noa toe moszen. De stam beskikn nameluk niet over een eign riolerink. ‘Et opper'eufd steln deurumme veur de pleegies maar weer of te breekn en van ‘et olt een bruun café te maakn. Zo voldeed de nood‘ulp uut Kampm toch nog an een be'oefte...

A'j vrogger de haksie: ‘Elp de Rusen de winter deur!' Met Marcel van Dam as veurganger op de tillevisie. Vrachtwaangs vol ‘Ollandse ‘ulpgoederen bin toen noa Moskou ‘estuurd. ‘t Was botter an de galge ‘esmeerd want de Russen ‘adn agies gien ‘onger. De Russische vri'je markt wol meer geld an de eign producten verdienn en potn deurumme de binnlandse voedselveurroaden lange tied op. Ansien intussen is de kluts kwiet. ‘De Russen eerst steunn en dan now weer mutn boycotten,' marken ze verbaasd op. De Russen intussen stoan niks uut. In Moskou légn nog veurroaden zat uut de Marcel van Dam-haksie. ‘Elpen wi'j now de Russen mee de boycot deur,' constateern Jannus Flapuut.

‘As er ene groep van al det boycotten te lieden ‘ef, dan wel de tuinders uut de Koekoekspolder in IEsselmuuden,' markn Dark Toestebolte op. ‘Die raakn now gien paprika, tomate of komkommer meer an de Russen kwiet. De tuinders moszen deurumme veur steun noa Brussel. Maar deur was al 52 miljard weg'eugm an de Griekn, Spanjeurden en Italiaann. Die weetn van anpakn, maar dan veurnameluk euro's uut de knippe van de zurgzame lidstoatn. Van det geld wat weerumme geemm, bi'j veurbeeld veur onze tuinders in nood, is er niet bi'j. De Griekn wiezen noa de Pooln. Maar die geemm ook niet thuus. Te druk met de export van de eign paprika's en tomaatn noa Rusland. An goedkope sjaffeurs gien gebrek...

Debby Klooster uut Kampm ‘ef wat ni'js bedacht: de ‘Weggeefskuure'. Een soorte kringloopwinkel maar dan enkelt met spuln, rieppe veur de drèhbak. De allerarmsten uut de Kamper saamlevink kunn die in ‘Weggeefskuure' gratis op'aaln. De Gemeentereinigink is hofleverancier. Volgens Debby lup de amoe'j in Kampm de spuigaatn uut. ‘Er bin al ‘uusvaders,' zeg ze op Internet, ‘die in de IEssel vissen umme de kienders thuus nog wat te eetn te geemm.' Veur de broodneudige variasie een Wal'apper uut de Borgel...

Struukelen ik disse moand over een ni'j begrip: ‘Serious Hambtenaar.' Wat is det, een Serious Hamptenaar en wat dut ie serieus? Informeern doe'j bi'j de bron en dus beln met de gemeente. Ik droomm er ‘s-nachts van. ‘Met de gemeente Kampm. Oognblikkien astublieft.' Eem later een vrindelukke vrouwenstemme: ‘Bedankt veur 't wachtn, zegt u 't maar!' Mien tillefoon is er nog ene uut de prehistorie veurzien van droad en met de hoorn warm an ‘t oor riep ik: ‘Ja , ie spreekn met Hendrik Kruudmoes. Kruudmoes, ja. K.r.uu....' Nee gien Kruitmuis, maar Kruudmoes. Soep is det, maar dan op zien Kampers. Met wurst en rozienn en...' Krak, deed de tillefoon. Dan een vrouwenstemme met gerinkel van kuppies op de achtergrond: ‘Met de kantine! Zegt u 't maar.' ‘Ja, ie spreekn met Hendrik Kruudmoes en ik... Nee gien Kruitmuis, maar Kruudmoes. Soep!' Kantine-stemme, verbaasd: Soep? Veur ‘oeveule persoonn mag det wezen...?'

Noa een lange zwarftocht in ‘et woud van mis-communicsie eindeluk ‘et juuste leket. Wat of een Serious Ambtenaar betekenen en wat dut zo iemand? Waakzame stilte. Dan een vrouwe met een ‘pas-op-Bananen-Split-stemme: ‘Een Seri-hoes wat?' ‘Ja, antwoorden ik, ‘t stiet zo in de berichtgevink van de gemeente. Waakzame stemme: ‘O, maar de persoon die deur over giet is ‘er now niet. Moandag weer. Ik geef u even terug...' Krak.

En ja ‘eur, deur a'j d'r weer: ‘Goedenmiddag, met de tillefoniste. Zeg 't u ‘et maar.' Ja juffrouw nog ies met Hendrik Kruudmoes enne... Telefoniste verrast: ‘Ja, ik ‘eure ‘et al. De meneer van de soep! Oognblikkien. Verbindt u door.' ‘NEE! NIET WEER!' galpm ik deur ‘t happeraat. Maar 't was al te late...! ‘Met de kantine!' klunk ‘et bekend in mien oor...

Onzin natuurluk. Alles ‘edroomd. Een nachtmerrie. Toch is vake lange wachttieden uutzitn en van ‘et kassien noa de muure te wurn ‘estuurd a'j met bedrijven en instansies tillefoneern. Maar die Sirious Hambtenaar zat mien toch niet lekker. Zekers niet a'j weetn det ‘et ook weer een goed doel betruf weurin de gemeente (in crisistied!) met 10.000 Euro bi'jdraagt! Toch ies met de gemeente beln. Vrindelukke vrouwenstemme: ‘Met de gemeente Kampen. Zegt u het maar.' Ja, eh... met Hendrik Kruudmoes enne... Telefoniste: ‘Maar ik ken oe toch?! Kruudmoes, zegt u? Da's toch soep! Oognblikkien, verbind u door!' ‘Ho, ho wacht eem, probeern ik nog uut die valkoelle te ontsnapm. Maar reeds was deur die andere vrindelukke stemme: ‘Met de kantine!' NEE! NEE! NIET NOG IES!!!

Allo, Hendrik