Zakt in de geute, alweer wordt d’r e proat over ’t verkeer an de Iesselkante, en zo woar, burgers en belang’ebbendn goan op woendag twee november in de roadszaal met mekare in debat, ’t is openbaar dus iederene is welkom.
Maar of ’t allemoale veule zin ef betwiefel ik want de road ef al in meerder éid an e geum det ze niks willn veranderen. De proef van twee weekn één richtings verkeer op de kade en op de lange brugge ef een kladde geld e kost en levert waarskijnli’jk niks op. Maar aj terug goan kiekn dan is de file ellende die elke middag onstiet an de ieselkante boom strooms veur een belangriek deel begunn toen beneedn strooms één richtingsverkeer is in e stelt. Iederene die uut brunnepe of van de ‘anzewiek noa de lange brugge wil mut de ele stad deur kruuzn umme d’r te koomm. En as straks de ni’je parkeer garage kloar is wordt ’t verkeers anbod alleneg maar groter, en dus nog meer onneudig verkeer dwars deur de stad ene. Of ie muttn mensen dwingn umme de Meulnbrugge te neem, maar mensen loatn zich niet zo makkeli’jk dwingn. Miskien is ’t veur sommegn vluukn in de karke maar aj echt van al det sluup verkeer deur de stad of willn dan zuj an de Iesselkante beneedn strooms weer twee richtings verkeer muttn instelln. Dan vang ie twee vliegn in ene klap, een rustiger verkeersbeeld in de stad en minder file boomstrooms.
Met een bietien creatief boek‘oldn ef ’t college kans e zien um de rezarve pot van de gemeente op aanvaardbare ‘eugte te kriegn. Ze zulln wel muttn want wat d’r an stiet te koomm is niet misseli’jk. ’t Dosjee “IJseldelta zuid”, ene met merakels veule ‘eufdpiene. Reevedorp, dure ‘uuzn langs de ‘oogwater geule die d’r waarskijnli’jk niet koomm. In ’t argste geval is de schade dartig miljoen euro. En doar is allemoale over beslist in de veurige roadsperiode, toen alle cruciale beslissingn e neumm bin met de stem ver’ouding achtien stemm veur, ( de coalitie)en dartien stemm teegn (de oppositie). En now weet ik wel det ’t achterof een koe in de konte kiekn is, maar de argumentn van de oppositie en van een eleboel onafhankeli’jke deskundign bin nooit serieus e neumm. ’t was vechtn teegn de bierkaai, en wie mut uuteindeli’jk ’t gelag en de skuld betaaln, ie maggn saamt maar één keer roadn.
Donderdag oamd beslist de road in een ‘amerstuk over de toekomst van de koggewarf, en wat doar op stapel stiet det is niet mals, de olde buutn aamt wordt museum aamt, d’r kump een ni’je loods, en weer een skeeps ‘elling, en d’r kump een ni’je ‘oreca geleegn’eid in ’t pand ‘avenweg 5. Ten minste as det now eindeli’jk ies veur mekare is, want det is zo zachies an een gebed zonder ende. Een nogal ies gebruukte uutspraak van old wet’older Arend Hengeveld “de martelgang van Kromme Lindert” is ‘ier zeker op zien plaase. Maar ondanks al die grootse plann vergeetn ze toch weer wat en mut GBK an de belle trekkn um ze an ‘un woord te oaln um ‘t skokkers monument terug te plaassn op de plekke woar ie eurt, op de grens van Brunnepe, ik goa d’r van uut det ’t ook gebeurt, want belofte maakt skuld.
En zo ziej maar weer d’r is altied wel wat in disse stad.
Appien Floep
Tweeduizendzeventien | donderdag 27 oktober 2016 08:41