Zakt in de geute, ik vinne daj de uutdrukking doar zakt mien de broek van of niet te pas en te onpas muttn gebruukn, maar soms ontkomie d’r niet an. En dan denk ik in deze an ’t ofskeid van old wet’older Martin Ekker, die e sneuvelt is op de verkoop van de Stads kezanne, en een mosie van wantrouwn veur e bleem is deur gien antwoord te geemm op alle vroagn die ‘m e stelt waarn en net veur de tied zelf te vertrekkn, en now juist doar in de Stads kezanne zien ofskeids recepsie old.
En doar zakt mien now warkeli’jk de broek van of. Bovendien bin ik van mening det onze burgemeester d’r zich ook met een Jantje van Leiden van of maakt, want ’t is nooit een wet’older die een besluut nemp. ’t Is altied een college besluut. Dus niet terecht um alleent de skuld op Ekker zien Bort(ien) te leggn, ’t ele college ef kenneli’jk zittn sloapn.
Hanzedagen
Nog een paar weekn en Kampen stiet op zien kop, de internationale ‘Anze daagn stoan veur de deure en as ’t allemoale wordt zo ze ‘t ons veur spiegeln dan wordt ’t een merakels groot spektakel. En ’t zal zeker lukkn, want makkeli’jk , geld speult gien rolle. Woar ik mien wel oprecht zorgn over make is ’t verkeer en ’t parkeern, alle auto’s muttn de stad uut, zo’n elf ‘onderd vergunning ‘olders muttn maar zien woar ze negen daagn ‘un auto loatn, ze bin wel e informeerd deur de gemeente maar ie muttn de brievn drie keer leezn en dan maj bli’j weezn daj d’r de ‘elfte van snappn. En dan ook nog ies duuzendn bezuukers die ook ‘un auto argens kwiet muttn. Teegns woordig nuumm ze zo iets een verkeers infarct. Maar goed we zulln ’t allemoale beleevn.
Stadsbrug
’t Linksof verbod op de Zwolseweg richting Lange brugge blef discutabel, ik eure bij de tachtig procent die ’t een onzinnige moatregel vindt, ik snappe niet det wet’older GaitJan Velthoen ’t niet ef veurzien det mensen slim genog bin um een uutweg te vinn um toch van die kante de stad in te koomm. ’t Is niet ondenkbaar det ie now ook nog giet probeern um ’t te verbiedn um an de achterkante van ’t station te dreien. Dus nog meer burgertje pestn, maar goed water vindt ook altied een uutweg en dat zal veur creatieve geestn niet anders weezn.
Ofgeloopn vri’jdag oamd bin ik met mien Rietje noa de buutnkarreke e west, mien kammeroad dirigent Harry Poulssen nam noa zeumtien joar ofskeid van Immanuel, en hoe. In een bomvolle karreke een uutvoering um oe vingers bi’j of te likkn. Now bin ik toch al een bewonderaar van de kwaliteit van Poulssen en van Mozart, en as dan ook nog de Kronungsmesse en ’t Requiem van Mozart in één concert op ’t programma stoan dan kan mien oamd niet meer kapot.
En det gold denk ik veur iederene want de stoande ovasie die koor, orkest, solisten en met name de dirigent kreeg was indrukwekkend, d’r kwam gien ende an. Volgende moand noast de ‘anzedaagn nog een feesien, ons aller weekblad “de Brug”, bestiet vijf en twintig joar, en det loatn ze niet ongemarkt veurbi’j goan, dus old ’t in de gaatn.
En ziej maar weer leuke dingn en minder leuke dingn, d’r is altied wel wat in disse stad.
Appien Floep.
