Zakt in de geute, Kampen ef ’t goed e doan met de verkiezingn, de opkomst ‘oger dan ’t landeli’jke gemiddelde. Maar wat een ellende met die grote lappn papier die ook nog ies allemoale met de ‘and e telt mossn worrn. Ik eb een paar keer stemm mee e maakt met de stem computer, wat ideaal, um negen uur een druk op de knoppe en twee minutn over negen de uutslag compleet met alle voorkeurstemm. Aj noa de moane kunn dan mut ‘t toch ook mogeli’jk weezn in ’t digitale tiedpark um det risicoloos veur mekare te kriegn.
En noa een weke giet ’t leemtien weer gewoon zien gang, en toch is d’r ene die nog een posien mut nagel bietn, Hilde Palland, plekke 21 van ’t CDA, dus met 19 zetels net buutn de boot e valln. Maar ik dorve te veurspelln det ze tweede kamer ‘aalt, alles liekt d’r op det ’t CDA giet regeern, en det d’r ministers en staats secretarissn van die kante benuumd worrn. Loatn we met zien alln maar doemm veur Hilde, want ’t kan nooit gien kwoad een stadgenoot in ’t parlement, en ’t is ‘aar gegund.
Oj ’t now willn of niet ie kunn d’r niet um ene donderdag oamd nemp de road de belangri’jkste beslissing in disse roadsperiode, wel of niet Reeve dorp, een veurspelling is muuili’jk maar ’t liekt d’r op det d’r een krappe meerder’eid is umme te goan bouwn. Maar as d’r van de 31 roadsleedn zestiene of zeumtiene veur stemmn dan zok mien as college toch nog maar ies achter ’t oor krabbn, now weet ik best dat een meerder eid van ene stemme een democratische beslissing is, maar disse beslissing neemm met de grootst mogeli’jke minder eid teegn , doar woj toch niet bli’j van. As ’t een vri’je keuze veur de roadsleedn is dan ‘oop ik det bi’j de beslissing niet ’t argument is det bouwn minder meer kost dan niet bouwn, det zol een slechte ofweging weezn. Maar ik bin bange det ’t doar wel op an kump. Jonges en meissies denk goed noa want ’t Is nog altied een woar éid as een koe, bi’j twiefel NIET DOEN.
Wat ik niet snappe det de driemmde tuinties in de Borgel weer op de lange bane e skeumm worrn, det was now ies een prachtig creatief idee van de wiek vereniging binnenstad. En een mooie opsteker veur de ‘anzedaagn, met name in een joar det d’r een merakelse kladde geld uut e geumm wordt an die vier ‘anze daagn in juni. Kunn ze een keer wat kriegn, want de financiering was rond, zeeg Nardus Koster, binnenstad veurzitte,r en now loat de gemeente ’t ofweetn.
En dan is d’r nog de oproep van Richard Boddeus, marktmeester van de vlooiemarkt op tweedepinksterdag op de Oldestroate, ei’j dut det now vijf joar met een stuk of vijf vri’jwilligers en det is te weinig um de boel in goeie baann te leidn, eij ef meer mensen neudig en as die niet koomm dan gef ie de piepe an Maartn, en det zol toch zunde weezn. Want ’t is inmiddels uit e gruuid tot een mooi evenement woaran veule mensen plezier beleevn. Dus vuul ie oe geroepn neem contact op met Richardboddeus@hotmail.com en ie kunn de redder worrn van de pinkstermarkt.
En zo ziej maar weer, d’r is altied wel wat in disse stad.
Appien Floep
