Zakt in de geute, de gemeente ef weer ies wat bedacht en is veurneems um fietsen die in de stad niet binn de lijnties stoan vanof september of te voern noa de Zwartendiek, woar aj oe fietse veur 15 euro weer op kunn ‘aaln. Giet det now niet een bietien varre, en det in een tied dat we toch al met de neudige beparkingn te maakn em, ’t leem is op ’t moment bepoald gien feesien. Bovendien vroag ik mien of of de Boa’s in disse tied niet wat belangri’jkers te doen em.
Zo zag ik onlangs op de moandagmarkt det mensen met de fietse an de ‘and van de markt of e bonzjoerd wiern, ook een vrouwe die zeeg det ze op weg was noa een gruunteboer um een tasse met gruunte en fruit op te áaln, maar gien pardon, weg weezn, kon ’t mense met ‘aar zwoare tasse de ‘ele markt over sjouwn um die buutn de markt in áar fietstasse te doen, over klant vriendeli’jk’eid e spreukn.
En dan is d’r trammelant over een olde boerderi’je an de Kamper stroatweg, volgens de media ef wet’older Albert Holtland een dieltien e sleutn met de Bemog, Holtland zeeg een grote veurstander te weezn um die boerderi’je te sloopn. Maar woarumme die ‘oast, Bemog zeg nog elemoale niet te weetn wat ze met die plekke willn doen. En as die boerderi’je now echt niet meer te reddn is dan is det zo, maar ’t is een gemeenteli’jk monument, en die goj niet zomaar sloopn, dan muj wel de procedure die doar veur geldt volgn, want woarumme em we dan een monumenten road, as die d’r anders over denken dan mut det zwoar mee weegn, want die beginn zich te reurn, net zo as andere organisaties die zich terecht druk maakn over ons monumentale arfgoed, en wie weet weetn die miskien wel een ‘eel goed alternatief. Of goan we weer een periode van sloopn in, want det em we al vaker ‘ad.
We em ooit een burgemeester ad die ook zo’n Jan de sloper was, doar em we now nog die twee breede bruggn over de Burgel an te dankn, ene bi’j de Skoolstroate en de andere bi’j de Meeuwenweg, doar waarn deurbraakn dwars deur de stad e plent, oe kuj ’t bedenkn.
En toen kreegn we een aristocraat uut Dokkem as burgemeester, Sybren van Tuinen, en die vroeg of we ‘ier in onze mooie stad de goedwies kapot ‘addn, en die ‘aaldn gelukkig een dikke streep deur die onzinnige sloop plann, en doar muttn we ‘m now noa al die joarn nog altied merakels dankbaar veur weezn. Zo een keer per joar informeer ik ies eem bi’j de jonges van herbouw kadekraan, die olde krane die vrogger na de Iesselkante stun, oe varre of ’t d’r mee stiet, ’t is een kwestie van lang oasem, maar ze bin d’r nog steeds druk mee.
Ze meldn det inmiddels drie kwart van ’t bedrag wat neudig is an toezeggingn binn is, dus ’t liekt d’r op det ’t goed kump. Varders is alles rond dus ’t kump an op ’t laaste bietien, goat saamt maar ies kiekn op de websait Kadekraan Kampen, en wie zich geroepn vuult kan de jonges ook nog steunn met een paar centn um det laaste ressien bi’j mekare te kriegn.
En zo ziej maar weer, d’r is altied wel wat in disse stad.
Appien Floep
