Zakt in de geute, aj uut bedde koom dan maj toch an neem daj wakker bin, maar toen ik de krante ad e leezn toen dacht ik, ie sloapn nog, en toen ek de krante nog maar ies e leezn, maar ik was toch echt wel wakker. En dan ek ’t over ’t artikel van Alphons van Winden, directeur van buro stroming. Die beweert det we niet langer bange ‘oevn te weezn veur ‘oogwater in de Iessel maar veur laag water, ei’j pleit d’r veur um saamt met buurlandn en binnvaart d’r an te warkn um de Waal en de Iessel bevaarbaar te oaln.
Bevaarbaar oaln van de rivier is een grotere opgave dan de ‘oogwater beskarming, de waterstandn worrn steeds leger veural in dreuge periodn, aldus van Winden, ei’j wil goan overleggn met alle minsters in ‘t stroomgebied. Zelfs de minister van waterstaat Cora van Nieuwenhuizen bemuuit d’r zich al mee, miskien muttn we de centn die op de planke liggn veur diek ver’ogingn wel in goan zettn um de rivier op peil te oaln zeg ze, dus ie kunn gevoegeli’k an neem det ’t um eem serieuze zaak giet. En wij ons maar joarn lang veur een kladde geld beskarmn teegn natte voetn, ’t Is toch niet te geleuvn, zo van ’t ene uuterste noa ’t andere uuterste.
De rivier bodem slet uut, in de laaste ‘onderd en vieftig joar is ie twee en een ‘alleve meter lager e worrn. En now vroag ik mien toch in alle gemoede of bin ze doar now pas achter e koom, of em d’r een antal knappe koppn joarn zittn sloapn. Maar ‘oe dan ook, ‘ier zulln we de komende tied nog veule van ‘eurn en ‘t valt zeker onder de categorie wordt vervolgd. Now de kruutdampn van oldejoars oamd op e trokkn bin kunn we constateern al oewel iedere euro schade d’r ene te veule is, det ’t in onze stad niet meer te vargeliekn is met een paar generasies terug, ’t leek toen wel oorlog in Brunnepe, d’r mossn zelfs ME pelotons an te passe koom um nog arger te veurkoom, en as de pliesie niet kwam opdaagn dan gingn ze met de melkbussn de stad in um ze uut te daagn, en de volgende dag was ’t overal een grote bende.
Winkeliers rond de buutn áamt en in de Oldestroate mossn ‘un gevels en etalages barricadeern um een kladde skade te veurkoom, aj in die tied e zegd ‘addn in twee duzend negentiene giet de Borgemeester op een melkbusse zittn die de kleurn en de logo’s ef van de pliesie, dan ‘addn ze oe veur gek verkloard. Op det punt is d’r gelukkig een boel ten goede veranderd, pette of veur onze borgemeester Bort Koelewijn die ‘ier zeker een bijdrage an e levert ef.
En of d’r now een gedeelteli’jk of totaal vuurwark verbod kump, onze tradisie ‘oeft niet in gevoar te koom want carbied skietn valt niet onder vuurwark, want ’t zol toch zunde weezn as det ook al niet meer mag. Maar veuruutlopend op een eventueel vuurwark verbod is ’t miskien een suggestie veur de borgemeester um op oldejoarsoamd een mooie vuurwarksjow an de Iesselkante te organiseern, we weetn toen de KOV en de Kamper ui-tdaagn nog vuurwark ‘ieldn doar merakals veule mensen op of kwaam. En of ‘t now wel of niet lukt, d’r is toch altied wel wat in disse stad.
Appien Floep
