Zakt in de geute, zo zachies an verdwienn d’r steeds meer woordn en uutdrukkingn in ons Kamper dialect, en det is merakels jammer, um maar ies wat te nuum. De schort van opoe was een boezelaar, en de schort van de sigaremaker was een een slonde. Noa de bakker ging ie veur een kemiesien, en koekies waarn maalmoppies of deesies, noa de gruunteboer veur een bule eerbeezn en noa de visboer veur een riesien bukkens. Wie et d’r nog wottels met look, en wie giet d’r nog noa de skeerboas. Bramen waarn brummels, een rits was een treksluting, een speen was een tukke, en reuma was rimmetiek, en iemand die graag ’t noatien van de kouse wol weetn was een oarneuze.
Wie gebruukt nog de woordn altoos, en det ek in de krante e leest. Wie zeg d’r nog Suntekloazendiek, wie nuumt ’t Keizers kwartier nog ’t achterummegien, wie nuumt een roeiboot nog een skuute, wie zeg nog drekbak tegen de container en wie nuumt de ‘Anzewiek nog Korea (en wie wet nog woarumme ?) Wie vrog d’r in de winkel nog um een flessien reuk. Ik kome doar eigenli’jk op umdet Derk de Vuurpiepeveurige weke an mien vroeg, of ik de uutdrukking kende “ei’j ef de klompe niet kapot”, det zeegn ze teegn iemand die in goeie doen was. Toen ‘erinnerinn zien vrouwe Femme knup in ’t emp d’r zich ook nog ene, mien va maaktn vrogger nog wel ies een overuurtien , en aj dan vroegn woarumme doej det dan zeeg ie ”dan kuj nog ies een veere van de bek of bloazn”.
As d’r ene van jullie ‘ier nog iets oardigs an toe kan voegn, reageer dan maar op dit stukkien, want ook al wordt ’t niet zoveule meer gebruukt, ’t is toch goed det ons dialect bewaard blef, want loatn we koestern van wat we nog ‘em. Maar wat mien dan wel weer goed dut is det de veurstellingn van op zien Kampers van volgend joar in de stads ge’oorzaal al zo goed as uut vekocht bin, aj d’r nog ene willn dan muj d’r achter an en zorgn daj een kaartien kriegn. In zien algemeen’eid vin ik, en det ek niet allenig van mien zelf, ik ‘eure in de wandelgangn niet anders, as d’r een tekort van acht miljoen goed e maakt mut worrn, dan dut de gemeente op zien zachts gezegd iets niet goed, ze em de piene over de ‘ele linie dan wel een bietien verzacht maar welke over ‘eid of ‘ier ook skuld an ef, of ’t now plaaseli’jk of landeli’jk is, ’t is altied de burger die de pottemonee mut trekkn en die ’t gelag mag betaaln.
Een klein lichtpuntien det de Brunneper Bongerd en de gebiedsvisie op Brunnepe een bietien andacht kreg, die wiek is al joarn ’t onder geskeum kiend van de rekening, wat det betreft eindeli’jk gerechtig’eid. En mooi um te zien det bundeling van krachtn ‘elpt, d’r is d’r ene die dit Brunneper suuksessien op zien conto mag skriem en det is Edy Prick van Bescherming Erfgoed Brunnepe, zien lobby saamt met andere Brunneper belang’ebbendn em dit bi’j de road veur mekare e kreegn. En zo zie maar weer d’r is altied wel wat in disse stad.
Appien Floep
