Zakt in de geute, de vekansie zit d’r op maar ’t vekansie weer is now pas echt begunn, merakels wat is ’t mooi weer. En aj dan zo een poosien vri’j bin dan ei’j ies de tied um oe gedachtn te loatn goan over een aantal dingn. En toen ek ies op een rijgien e zet oe ’t d’r bi’j stiet met ons Kamper taaltien, en wat blek, ook ons dialect is an verandering onder ‘evig. D’r bin een aantal woordn en uutdrukkingn die nog maar weinig gebruukt worrn.
Wie vrog d’r bij de slager nog um een stukkien vleis, en wie giet d’r nog noa de bakker veur een kemiesien, of noa de gruunteboer veur een deusien eerbeezn. Wie et d’r nog wottels met look, en wie zeg nog det ek in de krante e leest, wie nuumt de kapper nog skeerboas. Det zeeg ie, det woord det eur ie ook eigenli’jk niet meer. ’t woord agies, det weet ik agies niet, of die ken ik agies niet, eur ie ook niet veule meer. Wat now reuma is, was vrogger rimmetiek. En zo kan ik nog wel een poosien deur goan. En vinn ie ’t saamt leuk um doar ook is over noa te denkn en weet ie d’r een paar dan eur ik ’t graag, reageer dan maar op dit stukkien, dan koom ik ’r de volgende moand wel op terug.
Soms is Kampen een stad um trots op te weezn, en soms is Kampen een stad um oe veur te skaam, in de eerste plaase pette of veur de organisasie van ’t kade festival, wat die jonges in een paar joar tied op e bouwd em, geweldig, en dan mut de gemeente niet zo muuili’jk goan doen um een vergunning veur uur verlenging van de muziek, tot één uur, in plaase van tot twaalf uur, wat de organiasie graag wil, ‘t is spiekers op laag water zuukn, dan één keer in ’t joar maar een uurtien later sloapn. “loat goan”.
En dan de andere kante, ik eb ’t commentaar eurd tot varre in ’t land, de blunder van ’t Hoornbeekcollege, ik zal d’r niet meer vardr over uutweidn det is al genog e doan, maar in ‘t land is de stempel ”Kampen Calvinistisch bolwark” weer be’oorli’jk an e dikt. ’t Wordt d’r maar ies weer lekker in e vreemm. En det is zunde want det verdienn we niet.
Ook de road is donderdag weer an zet, en niet te zunig ook, ’t college stelt veur um de van Heutzkezanne of zo ie now e nuumd wordt “de Stadskazerne” an te koopn, enwel veur een bedrag van bi’jnoa vijf en ‘alf miljoen euro, ’t is net oj een emmer leeg gooi’n. En dan maar denkn det Kampen gien centn ef. Maar goed beter van een stad as van een dorp. Maar wie uuteindeli’jk de rekening giet betaaln, doar maj maar één keer noar roadn.
Ooit ef de road besleutn één keer per joar verantwoording of te leggn over ‘t gevoerde beleid in een politiek café, ‘eel toepasseli’jk, “de vierde dinsdag van september”. Veur zovarre ik mien kan ‘erinneren is det twee keer gebeurd. ’tzol goed weezn disse tradisie weer in re te ‘erstelln, want een kladde burgers vuuln zich nog altied niet direct betrokkn bi’j ’t bestuur, doar kan nog zat an verbetern. Want d’r is altied wel wat in disse stad.
Appien Floep
