Zakt in de geute, kump veurige weke Jan plakplatien bi’j mien en ei’j zeg’eur ies, ik ‘eb een ni’jgien weet ie wel det we sinds kort op Kampen woonn, ik zegge ‘oe zo op Kampen, now zeg ie umdet we inmiddels rond umme in ’t water liggn, we bin met die ‘oogwatergeule een eiland e worrn.
Ie zeggn toch ook niet det iemand in ’t Kamper eiland woont, nee ei’j woont op ’t Kamper eiland. Zeg maar niet teegn een Urker det ie in Urk woont, want een Urker woont nog altied op Urk. Ik mos d’r ies eem over noadenken maar ei’j ef geliek, we liggn rondumme in ’t water, ie kunn Kampen in en uut van of zes bruggn en viaducten, te beginn bi’j de brugge van de Roggebot, dan twee ni’je viaducten ene bi’j Kamperveene, en ene bi’j de Kamper stroatweg, dan de Meulnbrugge, de Langebrugge, en de Eilandbrugge, det bin d’r dus zesse.
Maar ondanks Jan zien geliek denk ik det we toch maar gewoon muttn bliem zeggn det we in Kampen woonn, want ik wone op Kampen det klinkt ook veur gien meter.
Eindeli’jk is noa joarn soebattn ’t skokkermonument verplaatst een entien richting Brunnepe, maar woarof ie now stiet of det now echt Brunnepe is doar kuj een boom over opzettn en doar woag ik mien maar niet an, want doar bin zelfs de brunnepers onder anvoering van de Beere Zandbargn ’t niet over eens. Maar ‘oe dan ook, ’t ef een kladde muuite e kost, maar ei’j stiet doar mooi, en de initiatiefnemers woaronder ‘Enkien ‘Uusman kunn tevredn terug kiekn op ’t resultaat van‘un joarn lange lobby wark.
Maar wat em ze now e doan, op de veurmalige plekke van ’t monument em ze die banke die stun op ’t van ‘Eutsplein met die mozaieksteenties doar neer e zet, en doar stiet ie dan zielig te stoan, ik vin ’t een arremoedig gezichte, ’t liekt nanns op, dan kuj d’r beter niks neerzettn, goat zelf maar ies kiekn. En aj een goed idee em um ‘t doar wat op te leukn loat ’t maar weetn an de Brug.
Ik kan mien eigenli’jk niet goed veurstelln det de road noa zo’n lange tied reces op dartien september niet anders ef in te brengn dan lege briefies, want in feite is een roadsvergadering met allenig maar ‘amerstukkn niet anders. ’t Liekt d’r wel op det de road steeds meer op ofstand kump te stoan van ’t college. ’t Kan ook weezn det roadsleedn steeds minder van zich loatn ‘eurn, vlammende discussies, en vurige betoogn bin niet meer an de orde.
Ik wete det ’t weing zin ef um terug te griepn op wat e west is maar roadsleedn as Henk Bastiaan, Cees Kranenburg, Warner Brink, Knelis vt Ende, Rie Woning en Ruud Toller det waarn mensn die glans an roadsvergaderingn wistn te geem, ’t was genietn, ie zattn op de punte van de stoel.
Misschien addn we nooit ofskeid muttn neem van ’t monistische stelsel, want de eerli’jk’eid gebied te zeggn det de rolle van de road in ’t dualisme totaal is veranderd, ze maggn slechts as algemeen bestuur kaders stelln en achterof controleern wat ’t college as dageli’jks bestuur uutvoerd, ik blieve det merakels jammer vinn, maar ’t is niet anders we muttn ’t maar mee doen.
Maar ondanks alles is d’r toch altied wel wat in disse stad.
Appien Floep
