Zakt in de geute, wat giet de tied toch merakels snel, ‘t jaor is al weer ‘alf umme, d’r is politiek gezien ook eem wat rust an ’t front want de road is met vakansie of zo as zo mooi gezegd ze bin met reces. En dan goan ze an ’t eerste volle joar beginn, en eerli’jk gezegd ik verwachte d’r wel wat van met dit ni’je college.
Aj in de politiek oe kop boom ’t maaiveld uut steekn dan woj onmiddeli’jk weer onder de grond e skoffeld, kuj zien an Albert Holtland, frisse wet’older, die kump met een idee um ’t gebied rond de Boom ‘aamt now eindeli’jk ies serieus an te pakkn, een mooie plekke zeg ie veur de Kogge en een kogge museum. ( En wie weet ook metene een functie veur de verpauperde villa van nummer veertiene) maar de inkt is nog niet dreuge of ’t wordt al weer of e skeutn, in plaase det ze ze now zeggn loatn we d’r ies serieus noa kiekn, nee ‘eur, foj oe aalt iet in zien ‘eufd.
Zo is Gruunlinks (toen in de opposisie, en dan muj van goeie ‘uze koom um wat te bereikn) ook al ies met volledig uutgewarkt plan e koom veur ’t Boom aamt gebied, skitterend van opzet ook det ad ’t verdiend um serieus e neum te worrn, maar ook det is niet gebeurd. Misschien elpt ‘t now ze in de coalisie zittn um wat meer woar te maakn van ‘un idealn
Ik mut nog vake terug denkn an wet’older Henk Bastiaan, doar eb ik altied veule waardering veur ad, want as die d’r niet was e west dan ‘addn we in Kampen gien Kogge en ook gien Kogge warf ad, want det em we enkel en allenig te dankn an zien invulling van ’t wet’oldersskap. Aj wat willn bereikn dan muj veur de troepn uut bliem loopn, en zorgn det ze oe niet op de ‘akkn trappn
En ik verwachte det Albert Holtland een zelfde tiepe wet’older wordt as Henk Bastiaan det was, en ak doar geliek in kriege dan goan we vier interessante joarn tegemoet en dan valt d’r nog wel ies wat te skriem. Maar now eem een paar weekn wat anders, de Kamper Ui’t dagen koom d’r weer an, en die em in de loop van de joarn ook wel een bietien van ‘un glans verleurn, en det ef de ‘uidige organisator Jacco Swillens goed in de gaatn, ei’j wil de grandeur van joarn terug weer in ’t programma. Det was de tied toen Gerrit Bruins met ‘art en ziele leiding gaf an de organisisie, water shows, wieler rondes, vuurwark, ’t kon niet op.
Toen waarn de kamper ui’t daagn nog uniek, now is d’r gien stad of dorp of d’r is een braderie, ’t is allemoale veule van ’t zelfde. Maar loatn we Swillens ’t veurdeel van de twiefel geem, ei’j zeg geef mien een paar joar en ik make d’r weer een uniek gebeurn van.
Mog ie saamt met vakansie goan varre weg of kort bi’j, geniet d’r van, en aj weerumm van de reize ’t eerst de Ni’jetoorn zien klinkt gevulig deur oe ene, mooie stad ie bin van mien. (uut ’t Kamper stedelied)
En wees d’r maar trots op ook al is d’r altied wel wat in disse stad.
Appien Floep
