Zakt in de geute, werd ik veurige weke toch zowat van de zokkn e reedn op de oversteek bi’j de Korteweg, det ging maar net goed, en ik kan ’t de automobilist nog niet kwoali’jk neem ook. Want aj met de auto uut de stad koom dan ei’j bi’j de Ebbingestroate veurrang, en ook bi’j de oversteek bi’j ‘t ‘ertekamp, en dan koom ie bi’j de Korteweg en dan muj veurrang verleen. Zo onlogisch as maar kan, geef of overal de auto’s of overal de fietsers veurrang.
Ik eb begreepn det de gemeente doar al vaker op e weezn is, maar die doen net of ze gek bin. Geldt ook veur moatregeln die e troffn zolln worrn um de file an de Iesselkante wat te beparkn, ze stunn ofgeloopn vri’jdag weer tot an de Boom’aamt stroate, d’r zolln varre van te veurn bordn e plaatst worrn um an te geem det de brugge op ging en daj beter een andere route konn kiezn. Ook ‘ier is tot op ‘eedn niks mee e doan.
Maar, gelukkig is mien glas altied ‘alf vol, ”een ni’j college ni’je kanzn”, en ik mut eerli’jk zeggn ik ‘eb d’r wat meer vertrouwn in dan in ’t veurige college, ik vun ’t alleent jammer det Marieke Spijkerman VVD maar een joar wet’older is e west, ik denke daj noa een joar pas goed in de gaatn em oe of ’t wereltien in mekare zit, ik ád ‘aar graag een periode vol zien maakn. Maar goed now kump, Irma van de Sloot van GruunLinks op ’t pluus, en ik ‘ope det ze as enige vrouwe in ’t college die ‘aanties, want ze maggn zich zelf allemoale graag ‘eurn, een bietien in ’t gareel kan oaln, we goan ’t de komende vier joar beleevn.
Met de roep van PvdA um in ’t stad’uus an de balie gewoon met geld te kunn betaaln bin ik ’t volkoom eens, ’t is merakels klant onvriendeli’jk umme mensn te dwingn met de pin te betaaln, want ’t is niet verplicht um een pinpas te ‘em, en zo lange geld een wettig betaal middel is dan muj doar gewoon overal mee kunn betaaln, punt uut.
Veurige weke bin we met vriendn op bezuuk e west bi’j een gezameli’jke kameroad in Mijdrecht en doar kump ongeveer umme de tien minuten een vliegtuug over, die volgns die kameroad op zo’n achtien ‘onderd meter ’eugte vlog, en doar bin we van e skrukkn, we ‘addn d’r ons eigenli’jk nog nooit zo in verdiept maar det maakt toch veule meer lawaai as dat we d’r ons van veur e stelt ‘addn.
’t Is ook niet te varregeliekn met det lege toestel wat onlangs een proefvlucht boom ons gebied ef e maakt det is toch wel anders as wat wi’j now in prakti’jk ‘eurd em. Onze reactie was ,dat wi’j doar niet vroli’jk van zolln worrn as det bi’j ons ook dageli’jkse kost wordt.
Op de vroage van Mijdrecht of wi’j ook wel ies vliegend met vakansie goan mossen we toegeem dat det zo was, toen zeeg ie dus wat jullie betreft veur ons de lastn en veur jullie allenig de lustn. As jullie now een bietien van ons over neem dan wordt ‘t ‘ier ook wat rustiger. We konn ’m niet anders dan geliek geem.En zo ziej maar weer veur of teegn, d’r is altied wel wat in disse stad.
Appien Floep.
