Zakt in de geute, de verkiezings koorse begint wat of te zakkn, want loatn we eerli’jk weezn ’t is toch wel een spektakel veural die laaste weekn veur de verkiezingn, dan bin ze allemoale biezunder aktief, en vangn mekare de vliegn of. Aj in “de Brug” kiekn dan koom d’r in avvetensies allerlei koppies veurbi’j die zich zelf an priezn, ik stoa nummer zes op die lieste, en ik stoa nummer acht op die lieste, ’t is wel gien verkiesbare plaase, maar toch muj mien em, want ik ben de beste.
En toch bin d’r ook weer de neudige verrrassingn te meldn, det GBK zol winn was veurspelbaar de lokaaln doen ’t overal in ‘t land goed, net zo de winst van Gruun links, zelfs in Amsterdam em ze D66 of e troeft en bin now de grootste partij. Maar det ’t CDA 2 zetels in mos levern, ik ‘ad ’t niet veurzien. ’t Zelfde geldt veur de SGP, merakels trouwe stemmers en toch een zetel verleurn. En woar bin die stemm en die zetel now e bleem, Christenunie ef ze d’r niet bi’j e kreegn want die bin gelieke e bleem, en ook niet noa ’t CDA want die ef d’r twee verspeuld. De SP, now (Kampen Sociaal) van vier noa twee zetels, misschien zit doar de winst van GBK, en D66 die kan in Kampen maar niet varder koom dan ene zetel, en die PvdA die blef maar verliezn, en zo kuj nog wel uurn analiseern, maar ’t is en ’t blef koffiedik kiekn want de kiezer ef ’t laaste woord en die ef altied geliek.
En now begint ’t circus um ’t pluus, want ondanks dat ik denke, en ik bin de enige niet, det wet’older weezn een ‘onde bane is, stoan ze d’r toch veur in de rij, ie kunn ’t nooit goed doen, of een antal burgers is kwoad op oe, of de road is kwoad op oe, of de provincie is ’t niet met oe eens, as wet’older bi’j regelmatig de kop van jut. Vake wordt e zegd ’t mooiste van ’t wet ’oldersskap is de eerste en de laaste dag.
’t Zal nog lastig worrn um een college te vorm, d’r bin legio mogeli’jk’eedn, ik bin merakels beni’jd oe ’t d’r uut kump te zien, want links umme of rechts umme de stad mut wel bestuurd worrn.
Bin jullie allemoale kloar veur “Sail”, aj ’t ni’je bestuur maggn geleuvn dan wordt ’t een ‘eel spektakel anders dan alle veurige keern, alleent ie zulln maar in de stad woon, de ’ele stad is vol e plemt met bordn verboden te parkeren van dartig maart tot drie april, now kloar bi’j. Woar ik mien ook over eb verbaasd, de meniere woarop umme e goan is met de joarmarkt “de Heugte”, ik begriepe nog steeds niet, de organizasie kennende, det ze anvankeli’jk de ‘andskoen in de ring e gooid em deur de’ele markt of te bloazn, in plaase van tot ’t gaatien te goan. Maar gelukkig bin ze toch tot bezinning e koom, ik eb begreepn det zelfs de burgemeester vun det dit niet kon, dus gewoon de Heugte, en doar woar ie ‘eurd, en al meer dan drie ‘onderd joar is, in Brunnepe, woarvan akte. En zo ziej maar weer een goeie reedn um altied bi’j de les te bliem, want d’r is altied wel wat in disse stad.
Appien Floep
