Zakt in de geute, de discussie over de wind meulns stek de kop weer op, en now bin ik ’t met iederene eens die zeg det ’t lilleke dingn bin, en beslist niet fraai veur ’t angezichte van de stad. Maar as ’t zovarre zol koom det d’r niet genog gas meer e levert wier um oe ‘uus warm te kriegn en we worrn afhankelijk van stroom, dan denk ik det de stemming gauw umme dreit, en de mening rap de andere kante uut giet.
Boomdien denk ik ook dej ’t een bietien muttn relativeern, veur ‘onderd joar geleedn werdn d’r overal gas fabriekn uut de grond e stampt, en vieftig joar later werdn ze met de zelfde gang weer of e breukn, umdet ze niet meer neudig waarn, det em we ook in Kampen mee e maakt, aardgas was de toekomst, we weetn now inmiddels wat doar de Groningse gevolgn van bin. Want ’t zal mien niks verwondern det d’r met de windmeulns ’t zelfde gebeurt, aj een antal joarn varder bin dan bin ze net as de gasfabriekn niet meer neudig en worrn ze op e ruumd um det d’r weer wat anders is. Dus ik denke det op dit moment aksepteern en gedoogn ’t beste is, want as iederene d’r van overtuugd begint te raakn det ze veur de noabi’je toekomst echt neudig bin, ( maar as niemand ze in zien achtertuin wil em), dan koom we gien steek varder.
Veurige weke ek een artikel e leest van een weetnskapper over de kracht van de zunne, ei’j zeeg det de zunne elke dag zeum duzend keer meer energie gef as det de ‘ele wereld neudig ef, allenig um ’t overal te kriegn is nog een lange weg, en ‘t is nog veuls te duur um die zunne warmte te eksploteern, maar die weetnskapper is d’r merakels van overtuugd, det is de toekomst zeg ie en niet anders.
Ik ‘ad mien ‘eilig veur e neum um niet weer over de Boom aamt stroate veertiene te beginn, en det troann dal achter mien te loatn, maar now bliekt toch weer, aldus Gruun links, det de road informasie van erfgoed ontwikkelaar ”de Boei”, ont oaln is. En as det warkeli’jk zo is dan verdiend Niels Jeurink van Gruun links die ’t an e kaart ef alle steun van de road um de onderste steen boom te kriegn, um een gevleugelde uutspraak van old wet’older Arend Hengeveld te gebruukn, ’t is zo zachies an de martelgang van Kromme Lindert.
Veurige keer ek iets niet goed e doan en det foutien muk eem wegwarkn, ik ‘ad Eibert Spaan kopman en wet’older van de SGP bi’j ’t liesien ofzwaaiers e zet, en det was ‘ardstikke fout, sorry, want Eibert giet niet weg, maar SGPer Wim van der Linde giet de politieke arena verloatn, en doarmee verliest de road een deskundig en al om gewaardeerd roadslid.
Één en twintig maart maggn we met ien alln weer noar de stembusse, um een ni’je gemeente road te kiezn, want oe oj ’t ook wendn of keern, rechts umme of links umme de stad mut wel bestuurd worrn. Ik mag ‘oopn daj doar allemoale van deurdrungn bin en gebruuk goan maakn van oe democratisch recht. Want aj goan stemm dan ei’j ook recht van spreekn, en det zok maar doen,
want d’r is altied wel wat in disse stad.
Appien Floep
