Zakt in de geute, de karsdaagn bin dit joar op moandag en dinsdag, dus ie em een ‘ele weke inclusief een paar extra koopoams umme de boodskappn in ‘uus te ‘aaln, en toch willn een paar petijen in de road onder anvoering van D66 de winkels ook nog op zundag los doen. Terwi’jl ze op ‘un klompn kunn anvuuln det doar gien meerder’eid veur is. In mien umgeving is de conclusie zowel links as rechts denkendn die ik ‘t vroagd eb, vri’jwel ’t zelfde, van ons oeft ’t niet. En persoonli’jk, maar ik respecteere een ieder zien mening, ik bin zo merakels bli’j met die vri’je zundag, gien tillefoon, gien agenda, gewoon lekker ontspann, en dan kan ik d’r weer een weke teegn an.
’t Wrak van de Kogge in Lelystad is ook weer ies in ’t ni’js, ei’j is kenneli’jk de muuite weerd um bewaard te bliem, maar ’t kost wel een kladde geld, ’t conserveern kost zo’n ander ‘alf miljoen en ‘t totale proces kost minimaal vijf miljoen euro en ’t duurt ook nog ies zes joar veurdet ’t kloar is, en ’t wordt betaald deur een antal over ‘eedn.
Onze burgemeester Koelewijn ziet ‘m al in Kampen lign, maar as die over’eedn noa ofloop as Kampen ‘m wil em dan ook de rekening bi’j ons neerleggn, dan vrees ik met grote vreeze, want doar wordt met gien woord over e rept.
En we bin toch al weer de klos, onze parkeermeters warkn niet zoas ’t mut, dus mut alles vervangn worrn, ander’alf miljoen euro, ’t net oj een emmer leeg goojn. En woar ze ook noar muttn kiekn as die dingn met de veurkante in de zunne stoan dan kuj onmogeli’jk zien wat aj doen, ie zien dan ook de mensn allerlei caprioln uut ‘aaln um de betaling of te rondn.
Zol ’t now eindeli’jk woar weezn det de stadsvilla an de Boomaamtstroate e restaureert wordt, now de stichting de Boei d’r zich over ontfarmt ek d’r eindeli’jk vertrouwn in, want ’t college klungelt d’r al joarn mee en kan maar niet tot een ende koom.
Pette of veur mien kameroad Ruud Toller, ei’j ef ‘t veur mekare e kreegn um de brievn busse op de ‘oek van de Noordweg en de Julianastroate die Post NL ‘ad weg ‘aald terug te kriegn, as Ruud zich argens in vaste bet dan lot ie nooit meer los, now begriep ik best det ‘t antal brievn terug lop maar um now noa de laaste inkrimping toen bin d’r ook al een antal weg ‘aald now weer 16 bussn weg te’aaln is wel arg veule van ’t goeie.
Det de tabakslobby machtig is det stiet as een poale boom water, maar ze muttn wel van ons laaste stukkien cultureel arfgoed ofbliem, ‘onderd joar geleedn warktn de ‘elfte van de kamper bevolking in de sigaarn industrie, en ’t enige wat we nog em is de Olifant an de Oldestroate, woar ze met de ‘and onder de name “oud Kampen” nog ’t vak uut eoefenen.
Ik eurdn wet’older Geert Meijering op de radio, en ei’j was strijdbaar. We loaten ons det niet ofpakkn zeeg ie. Al die regels die ze doarveur bedacht em die geldn niet veur Kampen’t eurd bi’j de stad as de Ni’je toorn en de langebrugge.
En zo ziej maar weer, blief bi’j de les want d’r is altied wel wat in disse stad.
Appien Floep
